Islandııa kezekti sensatsııasyn jasaı ala ma?
ASTANA. QazAqparat - Búgin fýtboldan 2018 jylǵy Álem chempıonatynyń D tobyndaǵy komandalary kezekti kezdesýin ótkizedi. Islandııa quramasy Nıgerııany qabyldaıdy, dep habarlaıdy QazAqparat tilshisi.
Fýtbolsúıer qaýymǵa sensatsııa jasaýshy retinde tanylǵan Islandııa quramasy Volgograd alańynda Nıgerııamen kezdesedi. Bul oıynda kelesi aınalymǵa shyǵatyn komanda anyqtalýy múmkin. Araldyqtar birinshi kezdesýde Argentınamen teń tústi. Esep - 1:1.
Sonymen, Islandııa quramasynyń álem chempıonatynda deıingi joryǵy qandaı edi? Qysqasha toqtalaıyq.
Alǵash ret 1958 jyly Shvetsııada ótken álem chempıonatynyń irikteý oıyndarynda 4 match ótkizdi. Eldiń úlken fýtboldaǵy jetistikke jetken ýaqyty 2011 jylǵa sap keledi. Osy jyly Islandııanyń jastar quramasy Eýropa chempıonatynyń fınaldyq kezeńine joldama aldy. Olar toptyq kezeńinde ataqty Danııany tize búktirip, kishigirim sensatsııa jasady. Bir qyzyǵy, qazirgi komandanyń 8 oıynshysy - sol jastar arasyndaǵy chempıonatta óner kórsetkender.
Al vıkıngterdiń 2016 jylǵy Frantsııada Eýropadaǵy jetistigi kúlli álemniń nazaryn aýdartty. Buǵan deıin mundaı iri jarysqa qatyspaǵan aral oıynshylary óz tobyndaǵylardan basym túsip, pleı-off básekesine tartty. Munan soń aǵylshyndardy utyp, shırek fınalǵa bir-aq shyqty.
Reseıdegi álem chempıonatyna joldama alý úshin Ýkraına, Horvatııa, Túrkııa syndy azýlylardyń aldyn orady.
Búgin alańǵa shyǵatyn fýtbolshylardyń qatarynda «Everton» (Anglııa) «serkesi» Gıýlfı Sıgýrdsson men «Aýgsbýrg» shabýylshysy Alfred Fınnbogason birden kózge túsedi. Olaı bolsa, bul jigitterge qarsy turatyn Nıgerııa quramasy týraly ne bilemiz?
Osymen 6-shy Álem chempıonatyna qatysyp otyrǵan Afrıka qurlyǵynyń ókilderiniń eń basty jetistigi - 1998 jylǵy Olımpıada oıyndarynyń «altyny». Olar Afrıka Kýbogyn 17 márte utty. Bıylǵy dop dodasynyń fınaldyq kezeńine joldama alý úshin Zambııa, Kamerýn, Aljırdi artqa tastap ketti.
Nıgerııa sapynda «sen tur, men ataıyn» degen fýtbolshylar jınaldy. Túrkııanyń «Qasympashasynyń» qorǵanysyna jaýapty Kennet Omerýo men «Maıntsta» oınaıtyn Leon Balogýndy jurt jaqsy biledi. Talaı jyl «Chelsıdiń» ortalyq shebinde oıqastaǵan Djon Obı Mıkel áli babynda. Ahmed Musa, Vıktor Mozes, Kelechı Iheanacho syndy sańlaqtardyń qaı-qaısysy bolsa da, negizgi quramnyń jigitteri.
Islandııa FIFA-nyń jańartylǵan reıtınginde 22-orynda tur. Nıgerııa 48-satyda. Qos komanda arasyndaǵy kezdesý búgin «Qazaqstan» telearnasynda saǵat 21:00-de kórsetiledi.
