Islamtanýdyń qazaqstandyq mektebiniń ǵylymı negizin qurý qajet - Ermekbaev

ASTANA. QazAqparat - Islamtanýdyń qazaqstandyq mektebiniń ǵylymı negizin qurý qajet. Bul týraly búgin Parlament Májilisindegi Úkimet saǵatynda QR Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.

Vedomstvo basshysynyń atap ótýinshe, sońǵy jyldary azamattar dinshildiginiń jyldam ósýi - dinı mádenıettiń durys qalyptasýynan jáne dinı dogmalardy synı qabyldaýdan ozyp ketti. Sonymen qatar elimizdegi dinı aýdıtorııaǵa syrtqy teris áserler kúsheıdi. Buǵan aqparattyq keńistiktiń ashyqtyǵy jáne jahandaný protsesteri yqpal etýde.

Osyǵan baılanysty Ermekbaev memleket pen dinniń ózara qarym-qatynasynyń jeke modelin ázirleý qajettigin atap ótti.

«Islamdy túsiný boıynsha biz jeke mektebimizdi daıarlaýǵa tıispiz. Bul rette sheteldik syndardan qaýiptenbeı, jaltaqtamaý kerek. Islamtanýdyń qazaqstandyq mektebiniń erekshe qyrlaryna bizdiń polıetnıkalyq eldiń ulttyq mádenı-tarıhı erekshelikterin eskere otyryp, rýhanı, moraldyq-etnıkalyq qundylyqtary tirek bolýy qajet», - dedi ol.

Bul turǵyda N. Ermekbaev eskirgen dogmalardy qabyldaýda sabyrlyq pen ıkemdilik tanytý, dinı senimdi árbir adamnyń jeke isi retinde qabyldaý, ózge kózqarastardy ustanatyndarǵa meıirimdilik pen toleranttylyq kórsetý, zaıyrly memlekettiń zańdaryn oryndaý máselelerine mán berý qajettigin sóz etti.

Úkimet saǵatynda atap ótilgendeı osy maqsattardy boıynsha arnaıy ǵalym dintanýshylardyń toby quryldy.