Islamofobııamen ǵylymnyń kómegimen kúresý qajet - IYU Bas hatshysy

ASTANA. QazAqparat - Islamofobııamen ǵylymnyń kómegimen kúresý qajet. Bul týraly búgin  elorda tórinde ótip jatqan Islam yntymaqtastyq uıymynyń ǵylym jáne tehnologııalar jónindegi birinshi sammıtinde IYU Bas hatshysy ıÝsef ben Ahmad ál-Oseımın málim etti, dep habarlaıdy QazAqparat.

«Aǵymdaǵy jaǵdaı musylman álemi aldyna syn-qaterler tóndirýde. Qazirgi ýaqytta biz shynaıy qaýiptiń aldynda turmyz. Sebebi terrorızm, ekstremızm, ıslamofobııa órship keledi.  Buǵan qosa,  bizdiń elderimizde jumyssyzdyq, saýatsyzdyq pen kedeıshilik syndy problemalar da bar. Biz bularmen kúresýimiz qajet ári bul kúreste ǵylym men tehnologııalardy qoldanýǵa tıispiz. Biz qoǵamymyzǵa sáıkesinshe bilim berýimiz kerek», - dedi ol.

Onyń aıtýynsha, IYU tamasha jetistikterge qol jetkizgen jas ǵalymdarǵa arnalǵan  medıtsına, ınjenerııa jáne aqparattyq tehnologııalar salasyndaǵy keshendi baǵdarlama ázirleýmen aınalysyp jatyr.

Eske sala keteıik, bul sammıtti ótkizý bastamasyn 2016 jyly Ystanbulda IYU Sammıti barysynda QR Prezıdenti Nursultan Nazarbaev kótergen bolatyn. Bıylǵy shara «Islam álemindegi ǵylym, tehnologııa, ınnovatsııa jáne jańǵyrý» taqyrybyna arnalyp otyr. Memleket jáne úkimet basshylary osy kezdesý barysynda alǵash ret ǵylymı-tehnıkalyq máselelerdi talqylaýda.