Islamnyń atynan jasalǵan qastandyq, ıslamnyń abyroıyna jasalǵan qastandyq - Ábsattar qajy Derbisáli
TANA. 16 qarasha. QazAqparat /Rýslan Ǵabbasov/ - Islamnyń atynan jasalǵan qastandyq, ıslamnyń abyroıyna jasalǵan qastandyq.
Búgin Qazaqstan dintanýshylarynyń birinshi forýmynda Qazaqstan musylmandary dinı basqarmasynyń tóraǵasy, Bas múftı Sheıh Ábsattar qajy Derbisáli osylaı aıtty.
«Dinniń atynan jasalǵan qastandyq, eń birinshiden dinge qarsy jasalǵan qastandyq. Islamnyń atynan jasalǵan qastandyq, ıslamnyń bedeline, abyroıyna jasalǵan qastandyq»,-dep atap ótti qajy.
«Qazir ıslamǵa jala jabý oqıǵalary kezdesip jatyr. Islamdyq fýndamentalızm jáne basqa da osyndaı uǵymdar jala retinde jarııalanýda»,-deıdi ol.
Islam - birigýdiń, yntymaqtyń ári birliktiń dini, -dep toqtalǵan Bas múftı, «qazaq halqy óte sabyrly ári táýbeshil halyq. Sondyqtan halqymyz elikteýdiń ornyna baıyppen qaraıtyn el. Arasynda jelpildep, elikteıtinder bar shyǵar. Ondaılar árbir halyqta bolady ǵoı. Biraq ókinishke qaraı dinniń atyn jamylǵan aǵymdar men sektalar bar»,-dep qynjylys bildirdi basqarma tóraǵasy.
Bas múftıdiń paıymdaýynsha, jastardyń keıde teris aǵymdarǵa barýyna sheteldik saıttardyń da róli bar.
«Qazaq halqy ıslamdy tek qabyldaýshy ǵana bolyp qalǵan joq, sonymen qatar biz ıslam órkenıetin baıytýǵa úles qosqan halyqpyz»,-dedi Ábsattar qajy Derbisáli. Osy oraıda ol ıslam dini kelgennen keıin elimiz aýmaǵynda birqatar ataqty ǵalymdar shyqqanyn eske salyp ótti.
