Islamnyń atyn jamylyp, lańkestik áreket jasaǵandardy múldem aqtaýǵa bolmaıdy - N.Sándibaeva

ASTANA. QazAqparat - Búgingi tańda jahandyq bet-burystarmen qatar álemniń túkpir-túkpirinen burq ete qalatyn lańkestik-terrorlyq degen oqıǵalar órship ketti. Buryn «E, qurysyn bul tek shetelderde ǵana ǵoı...» - dep oılaıtyn bolsaq, bul joly óz elimizden shyǵyp, qanshama beıkúná jan ómirmen qosh aıtysyp, artynda jesirleri men jetimderi qala berdi, deıdi Qazaq memlekettik qyzdar pedagogıkalyq ýnıversıtetiniń oqytýshysy, pedagogıka ǵylymdarynyń kandıdaty Nazıra Sándibaeva.

«Lańkestikten júrekteri shaılyqqan kóp memleketter ıslam dese úrke qarap, musylman baýyrlarymyzǵa kúdikpen qaraıtyn boldy... Lańkestik áreketterdiń halyqtyń beıbit jáne tynysh ómiriniń shyrqyn buzdy. Elimizdi dúrliktirip, halyqty shoshytqan Aqtóbe qalasynda oryn alǵan oqıǵadan soń, der kezinde «terrorıstik qaýiptiliktiń sary deńgeıi» jarııalandy. Sondyqtan da ıslamnyń atyn jamylyp, jasalǵan lańkestik áreketterdi aqtaýǵa múldem bolmaıdy. Kerisinshe, barynsha qataldyqpen jazalanýy kerek», - dedi ol.

Sonymen qatar ol barsha musylman úshin qasıetti bolǵan Ramazan aıynyń qarsańynda eldi dúrliktirip, halyqtyń basyn qaýipke tikkenderge, qan tógiske jol berýshilerge keshirim bola qoımastyǵyn basa aıtty. Qandy oqıǵanyń qurbany bolǵan otandastarymyzdyń otbasy músheleriniń orny tolmas qaıǵysyna ortaqtasyp, el bolyp kóńil aıtty.

«Ornynda qalsa, ońalar» degendeı, qaza bolǵandardyń januıalaryna myqtylyq pen sabyrlylyq tileımiz. Elbasymyz N.Nazarbaevtyń 9 maýsym kúnin jalpyulttyq aza kúni dep jarııalap, elimizdi tynyshtyq pen tatýlyqqa, kelisimge shaqyrýy, qaraly otbasylardyń kóńiline medet, jandaryna shapaǵat nuryn tókkendeı boldy. Prezıdenttiń júrgizip otyrǵan saıasatyn durys júzege asyryp, beıbit eldiń irgesin sógýge jol bermeýimiz kerek. Altaý ala bolsa, aýyzdaǵy ketedi degendeı, barynsha yntymaq pen aýyzbirlikke umtylyp, el tynyshtyǵyn saqtaýǵa úlesimizdi qosaıyq. Álem qyzyǵa qaraıtyn, halqymyzdyń uıyp otyrǵan aýyzbirligin, tynysh ómiri men beıbit tirshiligin, eldiń eren eńbegimen qol jetkizgen tuǵyrly Táýelsizdigimizdi saqtaýǵa barynsha kúsh salaıyq, baýyrlar»,-  deıdi N.Sándibaeva.