Islamdyq qarjylandyrýda memlekettik modeldiń 3 úlgisi bar - QR Indýstrııa jáne jańa tehnologııalar mınıstrliginiń ekonomıkalyq keńesshisi
ALMATY. 18 qyrkúıek. QazAqparat - Islamdyq qarjylandyrýdy damytýda shaǵyn jáne orta bıznestiń róli óte zor.
Bul búgin Almatyda ótip jatqan «Islamdyq qarjy boıynsha halyqaralyq otyrys: ońtaıly jaǵdaılar jasaý» dep atalatyn alqaly jıynda aıtyldy.
«Islamdyq qarjylandyrýda memlekettik modeldiń 3 úlgisi bar. Olardyń birinshisi - Malaızııa, Bahreın, Saýd Arabııasy, Pákistan, Túrkııa sııaqty dástúrli ıslam elderi, ekinshisi - musylman elderi bolǵanmen ótpeldi kezeńde turǵan TMD men Maǵrıb sekildi memleketter, úshinshisi - ıslam elderi yntymaqtastyǵyna kirmegenimen úlken musylman jamaǵaty bar Ulybrıtanııa, Germanııa, AQSh, Úndistan, Qytaı, Sıngapýr sııaqty elder», - deıdi QR Indýstrııa jáne jańa tehnologııalar mınıstrliginiń ekonomıkalyq keńesshisi Erlan Baıdáýlet. Onyń aıtýynsha, birinshi jáne úshinshi modeldegilerge qaraǵanda ótpeli kezeńdegi elderde ıslamdyq qarjylandyrý áli jetkilikti deńgeıde damymaǵan. Bul elderdiń negizgi belgilerine myqty ortalyq bılik, onsha damymaǵan naryqtyq ekonomıka men damýdyń alǵashqy satysynda turǵan jeke sektor tán. Onda ekonomıka memlekettik bıýdjetke baǵyttalǵan. Máselen, Qazaqstanda qazirgi tańda kúshti ulttyq monopolııany baıqaýǵa bolady, korporatıvtik sektor da bıýdjetke baǵyttalǵan. Tabıǵat resýrstaryn eksporttaý shaǵyn jáne orta bıznesti damytýǵa aıtarlyqtaı oń áser ete almaıdy. Indýstrııalandyrý ǵana olarǵa óz paıdasyn tıgizedi.
Qazaqstandaǵy ıslamdyq qarjylandyrýdy damytý qaýymdastyǵy tóraǵasy E. Baıdáýlettiń sózine qaraǵanda, dástúrli ıslam elderi de ıslamdyq qarjylandyrýdyń úlesi jalpy qarjy júıesinde jetkilikti deńgeıde joǵary. Máselen, Malaızııadaǵy ıslamdyq qarjylandyrý júıesiniń negizgi sıpattamasy memleket tarapynan jeke bızneske naqty qoldaýdyń júrgizilýi. Sońǵy 10 jylda onda ıslamdyq qarjylandyrýdyń úlesi 6,2-den 23 paıyzǵa deıin ulǵaıdy.
