Islamdyq qarjylandyrý nesimen erekshe – sarapshy jaýaby

ASTANA. KAZINFORM – Islamdyq qarjy júıesi dástúrli qarjylandyrýdan nesimen erekshelenedi? Bul saýaldy Islamdyq qarjy jáne bıznes qaýymdastyǵynyń tóraǵasy, Astana halyqaralyq qarjy ortalyǵynyń ıslamdyq qarjy baǵyty boıynsha jetekshisi Mádına Týkýlovaǵa qoıǵan edik.

- Birinshiden – munda ósim paıyzy bolmaıdy, ıaǵnı aqshadan aqsha jasaýǵa ruqsat etilmeıdi. Islamdyq qarjy adaldyqqa, etıkaǵa jáne ashyqtyqqa negizdelgen. Sonymen qatar, bank pen klıent arasyndaǵy qarym-qatynas seriktestikke negizdelgen. Bank pen klıent bir-birimen seriktes retinde jumys isteıdi. Jaqynda semınarda boldym, sonda túrik ıslam bankteriniń ókili óte qyzyqty jaıtpen bólisti, dástúrli bank úshin jaqsy klıent degen kim? Bul – qaryzyn ýaqytynda tóleıtin klıent, biraq únemi klıent emes, nelikten? Sebebi tólem keshiktirilgen jaǵdaıda ósim men aıyppul jınalady, al ol dástúrli bankter úshin ol tabys kózi, - dep túsindirdi Mádına Týkýlova.

Mamannyń málimdeýinshe, ıslam bankterinde aıyppul men ósim alýǵa tyıym salynǵan.

- Alaıda, klıentti tártipke salý qajettiligine baılanysty sharıǵat ǵalymdary belgili bir jaǵdaıda aıyppul salýǵa ruqsat bergen. Biraq, bul aıyppuldyń somasy qaıyrymdylyqqa baǵyttalady. Ol qarajat banktiń atynan emes, klıentterdiń atynan qaıyrymdylyqqa beriledi. Bank bul aqshany «men qaıyrymdylyq jasadym» dep jarııalaı almaıdy, - deıdi ol.

Búgin Astanada alǵash ıslamdyq qarjylandyrý jáne bıznes forýmy ótip jatyr. Forýmdy Islamdyq qarjy jáne bıznes qaýymdastyǵy TIDAM agenttigimen birlesip, Astana halyqaralyq qarjy ortalyǵynyń qoldaýymen uıymdastyryp otyr. Oǵan 200-den astam adam qatysty.