Islamdyq ıpoteka bıyl iske qosylýy múmkin

ASTANA. KAZINFORM — Otbasy banktiń basqarma tóraıymy Lázzat Ibragımova elimizde ıslamdyq ıpoteka qashan iske qosylýy múmkin ekenin aıtty. 

— Islamdyq ıpotekaǵa qatysty bolashaqta kóp suraq bolady dep oılaımyz. Biz Pákistandaǵy Meezan Bank Limited bankimen yntymaqtastyq týraly memorandýmǵa qol qoıdyq. Qujat Báıterek holdıngi delegatsııasynyń iskerlik saparynda rásimdeldi. Qazir zańǵa ózgerister engizip jatyrmyz. Bes memlekettik organ óz kelisimin berdi. Endi Májilis ıslamdyq ıpotekaǵa ruqsat berse, biz ony osy jyldan bastap iske qosa alamyz, — dedi Lázzat Ibragımova Úkimette ótken brıfıngte.

Bank basshysy ıslamdyq ıpotekanyń talaptary men erejeleri de bólek bolatynyn atap ótti.

— Qazir Malaızııadaǵy ónimderdiń qandaı ekenin qarap, zerttep jatyrmyz. Islamdyq ıpoteka — qazirgi ıpotekaǵa uqsamaıtyn, múlde bólek júıe, — dep jaýap berdi L. Ibragımova tilshi suraǵyna.

Buǵan deıin Lázzat Ibragımova aldaǵy jyldary elimizde baspana baǵasy tómendemeıtinin aıtqan edi.