Islambek Saljanov: Qazaqstanda qaıyrymdylyq týraly durys túsinik qalyptastyrý kerek

NUR-SULTAN. QazAqparat - Elimizde qaıyrymdylyq jáne volonterlik uıym kóp, biraq qaıyrymdylyq ınstıtýy joq. Bul týraly Ortalyq kommýnıkatsııalar qyzmetinde «Qaıyrymdylyq pen eriktilik - ult mádenıetiniń bir bóligi» taqyrybynda ótken onlaın brıfıngte aıtyldy, dep habarlaıdy QazAqparat tilshisi.

«QR Prezıdenti Qasym-Jomart Toqaevtyń 2020 jyldy volonterler jyly dep jarııalaǵany barshańyzǵa belgili. Qazirgi tańda búkil álem, onyń ishinde bizdiń eldegi kúrdeli kezeńde eriktilerdiń róli burynǵydan da kóp suranysqa ıe boldy. Bıyl volonterlerdiń jumysy qalaı kúsheıgenine kýá boldyq. Pandemııa kezinde eriktiler aıanbaı eńbek etti. Tájirıbede kórsetkendeı, biz osymen shektelmeı, eriktilerde de, qaıyrymdylyq qorlaryn da belsendi damytýǵa úles qosýymyz kerek. Qaıyrymdylyq sharalary damyp ketken elderdiń tájirıbesine súıene otyryp jumys isteýimiz kerek», - deıdi «Altyn Qyran Foundation» qoǵamdyq qorynyń qamqorshylyq keńesiniń tóraǵasy Islambek Saljanov.

Onyń aıtýynsha, «Giving USA 2018» statıstıkasyna súıenetin bolsaq, amerıkalyqtar 400 mıllıard dollardy qaıyrymdylyqqa jumsaǵan. Onyń 71%-yn qarapaıym halyq jınasa, 16%-yn qoǵamdyq qorlar, al 5%-yn korporatsııalar jınaǵan.

«Bul kórsetkish AQSh-ta qaıyrymdylyq isine tutastaı el jumyldyrylǵanyn bildiredi. Batysta qaıyrymdylyq jasaý – jaqsy ádet, ári qalypty jaǵdaı. Olar mundaı nátıjege júıeli túrde qol jetkizgen. Olar qaıyrymdylyq jasaýdy mektep, ýnıversıtetten bastap qolǵa alǵan. Qazaqstan da «Giving USA Foundation» sııaqty ınstıtýt quryp, osy taqyrypqa qatysty zertteý jumystaryn júrgizip, qoǵamda qaıyrymdylyq jasaý týraly durys túsinik qalyptastyrýy kerek. Elimizde qaıyrymdylyq jáne volonterlik uıym kóp, biraq qaıyrymdylyq ınstıtýy joq. Degenmen elimizdiń tarıhy men salt-dástúrinde qaıyrymdylyq úlken mańyz berilgen. Qazaq halqynda buryn jetimder úıi de, qarttar úıi de bolmaǵan. Biz qaıyrymdylyqty júıeli túrde damytý úshin ózimizde bolǵan túsinikti qaıtaryp, halyqaralyq tájirıbeni zertteýimiz kerek», - deıdi ol.

Islambek Saljanovtyń qaıyrymdylyq sharalarymen aınalysqanyna 15 jyldan asqan. Ol ár qaıyrymdy istiń qaıtarymy bar ekenin aıtty.

«Jaqsylyq jasasań – Alladan qaıtady. Erte me, kesh pe, bárimiz o dúnıelik bolamyz, sol kezde ózimizben birge eshteńe alyp ketpeımiz. Bizdiń jasaǵan qaıyrymdy isterimiz artymyzda qalǵan iz bolady, sol sebepti elimizdegi qaıyrymdylyq sharalary men volonterliktiń damýyna árqaısysymyz úles qosaıyq», - deıdi «Altyn Qyran Foundation» qoǵamdyq qorynyń qamqorshylyq keńesiniń tóraǵasy.

Foto: assembly.kz