Islamabadtaǵy AQSh-Iran kelissózderi Vens pen Sharıftiń kezdesýinen bastaldy
ASTANA. KAZINFORM – Pákistan astanasynda Iran tóńiregindegi janjaldy retteý boıynsha kelissózder resmı túrde bastaldy, dep habarlaıdy Kazinform agenttiginiń tilshisi.
Pákistan premer-mınıstriniń keńsesi senbi kúni Pákistan premer-mınıstri Shehbaz Sharıf Islamabadta AQSh vıtse-prezıdenti Dj.D.Venspen kezdesip, AQSh pen Iran arasyndaǵy kelissózderdi bastady dep habarlady.
Kezdesýge sondaı-aq AQSh-tyń arnaıy ókili Stıv Vıtkoff pen Djared Kýshner, Pákistan tarapynan Syrtqy ister mınıstri Ishak Dar men Іshki ister mınıstri Mohsın Nakvı qatysty.
– Islamabadta kelissózder bastalǵan kezde Pákistan premer-mınıstri AQSh vıtse-prezıdentimen kezdesti, - delingen habarlamada.
Islamabad April 11 ,2026
— Prime Minister's Office (@PakPMO) April 11, 2026
As the Islamabad Talks commenced today, the Prime Minister of Pakistan, Muhammad Shehbaz Sharif held a meeting with His Excellency JD Vance, Vice President of the United States of America.
The U.S. Vice President was assisted by Special Envoy Steve… pic.twitter.com/XcH5x1VlHl
Budan buryn Sharıf parlament spıkeri Mohammad Bager Galıbaf pen Syrtqy ister mınıstri Abbas Arahchı bastaǵan ırandyq delegatsııany da qarsy aldy.
Biz buǵan deıin kelissózder janama formatta ótetinin, ıaǵnı ár delegatsııanyń bólek bólmelerde bolatynyn, al pákistandyq medıatorlar óz ustanymdaryn jetkizetinin habarlaǵan bolatynbyz.
Sonymen qatar Al Jazeera dıplomatııalyq derekkózderge silteme jasaı otyryp, Pákistannyń AQSh pen Irannyń Pákistannyń qatysýymen tikeleı kelissózderin qamtamasyz etý úshin eń joǵary deńgeıde barlyq kúsh-jigerin jumsap jatqanyn habarlady.
Osylaısha, kelissózder eki delegatsııa basshylarynyń qol alysýynan nemese olardyń arasynda pákistandyq resmı tulǵanyń qatysýymen bastalady dep kútilgen bolatyn.
Al, eger mundaı kelisimge qol jetkizilmese, taraptar Pákistannyń arashalaýymen janama kelissózderge kóshedi.
Talqylaýlar Iranmen qaqtyǵysty toqtatýǵa baǵyttalǵan jáne kúni boıy jalǵasady dep kútilip otyr.
Eske salsaq, osyǵan deıin AQSh Irannyń 6 mıllıard dollar aktıvterin bosatýǵa daıyn ekenin jazǵanbyz.