Islamabad sotynyń mańyndaǵy jarylys: 12 adam qaza taýyp, ondaǵan adam jaraqat aldy
ASTANA. KAZINFORM — Pákistan astanasynda jergilikti ýaqyt boıynsha shamamen saǵat 12:39–da sot ǵımaratynyń mańynda turǵan kólik jaryldy. Kem degende 12 adam qaza tapty.
Pákistannyń ishki ister mınıstri Mohsın Nakvıdiń aıtýynsha, lańkestik áreket saldarynan kem degende 12 adam qaza taýyp, 27 adam jaraqat alǵan.
Nakvı tilshilerge bergen suhbatynda jankeshti sot ǵımaratyna kirýge árekettengenin, biraq kire almaı, polıtsııa kóligine shabýyl jasaǵanyn habarlady.
Ol premer-mınıstr Shahbaz Sharıftiń jábirlenýshilerge medıtsınalyq kómek kórsetýdi, al quqyq qorǵaý organdaryna shabýyldaýshynyń esimin anyqtaýdy buıyrǵanyn qosyp ótti.
— Sotqa shabýyl jasaǵandar áshkerelenedi. Búgingi lańkestik shabýyldyń kóptegen baılanysy bar, jınalǵan dáleldemeler jaqyn arada jarııa etiledi, — dep málimdedi Іshki ister mınıstri.
Ol jarylystyń birneshe mańyzdy máni bar ekenin aıtty jáne eger onyń artynda sheteldik kúshter tursa, jaýapsyz qalmaıtynyn túsindirdi.
Mınıstrdiń aıtýynsha, jankeshti oqıǵa ornynda 10-15 mınýt boıy ǵımaratqa kirý múmkindigin kútip turǵan. Ol qurylǵyny polıtsııa kóligi jaqyn mańda toqtaǵan kezde iske qosqan.
Polıtsııanyń alǵashqy habarlamalarynda jarylys sot ǵımaratynyń syrtynda turaqta turǵan kólikte bolǵany aıtylǵan. Zardap shekkenderdiń arasynda talapkerler men qorǵaýshylar da bolǵan. Jarylystan keıin sot ǵımaraty evakýatsııalandy, adamdar apattyq shyǵý joly arqyly evakýatsııalandy, al sot otyrystary toqtatyldy.
Oqıǵa ornyna kóp uzamaı Islamabad polıtsııasy ınspektorynyń orynbasary, bas komıssar jáne sot-medıtsınalyq saraptama toby bardy. Tótenshe jaǵdaılar qyzmeti men quqyq qorǵaý organdarynyń qyzmetkerleri qaza tapqandar men jaraqat alǵandardy aýrýhanaǵa jetkizdi. Bas qalanyń PIMS aýrýhanasynda tótenshe jaǵdaı rejımi jarııalandy.
Eske sala ketsek, dúısenbiniń keshinde Úndistan astanasy Nıý-Delıdiń adam kóp júretin bóliginde baǵdarshamda avtokólik jaryldy. Dúısenbi kúngi keshki jaǵdaı boıynsha 9 adamnyń qaza tapqany jáne 20-dan astam adamnyń jaralanǵany habarlandy.