Islam uıymy AQSh prezıdentin palestınalyqtarǵa qatysty óz mindettemesin oryndaýǵa shaqyrdy
ASTANA. 25 qańtar. QazAqparat - Islam yntymaqtastyq uıymynyń (IYU) Bas hatshysy Amerıka prezıdentine hat joldap, palestınalyqtarǵa qatysty AQSh-tyń mindettemesin esine saldy. Bul jaıynda Middle East Monitor habar taratty.
muslim.kz saıtynyń jazýynsha, doktor Ekmeleddın Ihsanoǵly (Ekmeleddin Ihsanoglu) palestınalyqtar men ızraıldikter arasyndaǵy janjaldy beıbit ári ádil jolmen sheshýdiń múmkindigin arttyrý úshin osyndaı qadamǵa barǵandaryn málim ettti.
IYU shtab-páterine kelgen AQSh prezıdentiniń ókili óz eliniń osy uıymmen yntymaqtastyǵyn nyǵaıtqysy keletinin jáne osy jyldyń aqpan aıynda ótetin IYU-nyń 12-shi sammıtine qatysý nıeti baryn jetkizdi. IYU-nyń 12-shi sammıtinde Malı, Sırııa, Palestına jáne Mıanmadaǵy daǵdarysqa qatysty máseleler qarastyrylatynyn esterińizge sala ketkimiz keledi.
Ihsanoǵly óz hatynda IYU-AQSh yntymaqtastyǵy aıasyndaǵy baǵdarlamalardy da umyt qaldyrmady. Baǵdarlamalarda ana men balany qorǵaý, IYU elderindegi polıomıelıtke qarsy kúres, gýmanıtarlyq kómek máseleleri qamtylǵan.
Sonymen qatar, amerıka úkimetin ulttyq kemsitýge qatty ushyrap, qýǵyn-súrginde júrgen Mıanmadaǵy rohınıalyq musylmandarǵa qoldaý kórsetýge shaqyrdy.
Buǵan qosa, dinı alaýyzdyq pen arazdyqqa qarsy IYU men AQSh-tyń yntymaqtasý qajettiligine toqtalǵan. Osyǵan baılanysty strategııany ázirleýdiń alǵashqy qadamy AQSh-tyń burynǵy memlekettik hatshysy Hılları Klıntonnyń bastamasymen Ystambulda ótken bas qosýda jasalǵan bolatyn.
