Islam Sátpaev pen Aleksandra Le: Kelesi maqsat – Amerıkada ótetin Olımpıada
ALMATY. KAZINFORM – Olımpıadanyń qola júldegerleri Islam Sátpaev pen Aleksandra Le Parıj tórindegi jeńisine baılanysty pikir bildirdi.
«Bul júlde men úshin kútpegen jerden kelgen joq. Óıtkeni biz óte jaqsy daıyndyqtan óttik. Psıhologııalyq turǵydan daıyn boldyq. Olımpıada bastalǵan kezde medal alatyn kún týǵanyn anyq bildim. Endi bizdiń kelesi maqsatymyz – 2028 jyly Amerıkada ótetin Olımpıada», - dedi mergen.
Parıj Olımpıadasynyń taǵy bir júldegeri Aleksandra Le eldi saǵynyp kelgenin atap ótti.
«Bizdi osyndaı jylýlyqpen kútip alǵandaryńyzǵa qýanyshtymyz. Otanymyzdy saǵynyp qaldyq. Óz elińde jeńisiń erekshe seziledi. Biz kóp jyldar boıy nysana kózdeýde ornaǵan tynyshtyqty buzyp, júldeli bolǵanymyzdy tek bir kúnnen keıin túsindik. Sondaı-aq biz qazaqstandyqtar tek qana myqty emes, ári mergen ekenimizdi álemge dáleldedik», - dedi Aleksandra Le.
Nysana kózdeýden Qazaqstannyń bas bapkeri óz shákirtteriniń Parıjdegi jetistikterin baǵalady.
«Sportshylardyń daıyndyǵy jaqsy boldy. Sońǵy eki jyl boıy biz dál osy saıysqa daıyndaldyq. Olımpıadada oınatylǵan alǵashqy júldeni jeńý – úlken jetistik. Jalpy nysana kózdeýden 82 el jarysqa qatysyp, tek 19-y júldeli boldy. Azııa qurlyǵynda qazir básekelestik óte joǵary. Biraq álem qazir bizdi tanyp, bizden tipti qorqa bastady. Bul biz úshin maqtanysh», - dedi nysana kózdeýden Qazaqstannyń bas bapkeri Olga Vıacheslavna.
Eske salaıyq, 27 shilde kúni pnevmatıkalyq vıntovkamen 10 metrge nysana kózdeýden aralas komandalyq synda Islam Sátpaev pen Aleksandra Le Olımpıadanyń qola júldesin jeńip aldy.
Aıta keteıik, Aleksandra Leniń anasy Tatıana Kopeıko qyzynyń jeńisine baılanysty pikir bildirgen bolatyn.
Islam Sátpaevtyń anasy Álııa Sátpaeva ulynyń jeńisine baılanysty oı bólisti.
