«Islam memleketi» tobynyń sodyrlary 11 qyrkúıektegi oqıǵany qaıtalaımyz dep qorqytty
ASTANA. QazAqparat - «Islam memleketi» tobynyń sodyrlary 2001 jylǵy 11 qyrkúıekte AQSh-ta bolǵan qaıǵyly oqıǵany qaıtalaýǵa ýáde berdi. Bul týraly senbi kúni, 11 sáýirde TASS ǵalamtordaǵy ekstremısterdiń belsendiligin zertteıtin SITE uıymyna silteme jasap habarlady.
Islamısterdiń habarlamalary «BizQaıtaAmerıkanyÓrteımiz» heshtegimen biriktirilgen. Aktsııanyń birinshi táýlikterinde-aq sóz tirkesin paıdalaný eseligi 15 myńǵa jetti. Posttarda 11 qyrkúıektegi jáne Batys elderinde oryn alǵan teraktarǵa qatysty siltemeleri bar. Jańa aýqymdy lańkestik áreketterge barý jospary da sóz bolǵan.
Eske sala keteıik, 2001 jyly 11 qyrkúıekte «Al-Kaıda» lańkestik uıymy AQSh-qa terrorıstik shabýyl jasaǵan. Sodyrlar urlaǵan eki ushaq Nıý-Iorktegi Dúnıejúzilik saýda ortalyǵyna (World Trade Center), taǵy biri Pentagon ǵımaratyna soǵylǵan. Jalpy alǵanda shamamen 3 myń adam qaza tapty.
