«Islam memleketi» uıymy Irandaǵy joıqyn jarylysty óz moınyna aldy

«Islam memleketi» uıymy (Qazaqstanda tyıym salynǵan) tórt jyl buryn óltirilgen Islam revolıýtsııasy saqshylar korpýsynyń qaıratkeri Kasem Sýleımanıdi eske alýǵa arnalǵan is-sharada bolǵan joıqyn jarylystardyń jaýapkershiligin óz moınyna aldy, dep habarlaıdy Kazinform agenttigi BBC jańalyqtaryna silteme jasap. 

Irannyń Kermane qalasyndaǵy zıratta bolǵan eki jarylys 84 adamnyń ómirin qıdy. Olar Irannyń Izraıl jáne AQSh-pen qarym-qatynasy shıelenisken tusta bolyp otyr.

«Islam memleketi» telegramdaǵy akkaýntynda jarylysty belbeýi jáne jarylǵysh zaty bar eki izbasary uıymdastyrǵanyn habarlady.

Irannyń memlekettik buqaralyq aqparat quraldary buǵan deıin kem degende birinshi jarylysty jankeshti lańkes uıymdastyrǵanyn, ekinshisi de solaı bolýy múmkin ekenin málimdegen.

Irannyń joǵary jetekshileri, onyń ishinde rýhanı kóshbasshysy Hameneıdiń ózi bul zulymdyqqa kinálilerden kek alatynyn málimdep, biraq naqty kim ekenin aıtpaǵan edi.

Jarylystan keıin eldiń kóptegen qalalarynda adamdar jınalyp, «Amerıkaǵa ólim» jáne «Izraılge ólim» dep urandatty.

«Islam memleketi» — súnnıttik top, al Iran — shııttik memleket. Islamnyń bul eki tarmaǵy bir-birine jaý.

Buǵan deıin Irannyń ońtústiginde Kerman qalasyndaǵy molanyń janynda bolǵan eki jarylys saldarynan keminde 103 adam mert bolyp, 170-ten astam adam jaraqat alǵany habarlandy.

Sonymen qatar el prezıdenti Qasym-Jomart Toqaev Irannyń Kerman qalasynda bolǵan lańkestik áreketten kóp adamnyń qaza tabýyna baılanysty Ibrahım Raısıge kóńil aıtqan bolatyn.