Islam Karımovtyń qyzy jańa meshitke ákesiniń atyn qoıdy
ASTANA. QazAqparat - Ózbekstan prezıdenti Islam Karımovtyń kenje qyzy Lola Tıllıaeva óziniń joldasymen birge Tashkentte byltyr kóktemde órtengen meshitti qaıta turǵyzdy.
Lola bul meshitti óz ákesiniń qurmetine «Islam ata» dep ataımyn dep sheshken. Bul týraly ol áleýmettik jelide bólisti,-dep habarlaıdy muslim.kz.
«Dúnıejúziniń musylman qaýymy qasıetti Qurban aıt merekesin toılap jatqanda jaqsy jańalyqpen bóliskim kelip otyr. Tashkentte «Islam ata» meshiti ashylady. Bul meshit Ferǵana Joly kóshesinde ornalasqan. 2015-jyldyń kókteminde meshit tolyqtaı órtenip ketken edi. Joldasym Tımýr Tıllıaev ekeýmizge saýapty is jasap, meshit ǵımaratyn qaıta turǵyzýǵa múmkindik bergen Allaǵa shúkirlik etemin», - delingen Lolanyń habarlamasynda.
Meshitti qaıta qalpyna keltirý jumystary ótken jyldyń aıaǵynda bastalyp, 9 aıǵa sozylǵan. «Kópshiliktiń usynýymen meshitti Ózbekstannyń alǵashqy prezıdenti - meniń ákem Islam Karımovtyń qurmetine «Islam ata» dep ataý týraly sheshim qabyldandy», - dep qosty Lola.
Eski meshitpen salystyrǵanda, jańa meshit kólemi 1,8 ese ulǵaıǵan - 2900 sharshy metrden 5400 sharshy metr boldy. Endi meshitke 560 adam syıady. Meshit munarasy men qabyrǵasynda qasıetti Quran sózderi jazylǵan.
Meshitte kitaphana men dáret alý bólmeleri de bar. Sondaı-aq múmkindigi shekteýli jandarǵa arnalǵan jabdyqtar, aýa tazalaǵysh júıe men salqyndatqysh ta ornatylǵan.
