Islam Kárimovtiń eskertkishin jasaýǵa halyqaralyq baıqaý jarııalandy
ASTANA. QazAqparat - Ózbekstannyń tuńǵysh prezıdenti Islam Kárimovke Tashkentte eskertkish turǵyzýǵa oraı halyqaralyq shyǵarmashylyq baıqaý jarııalandy.
Bul týraly QazAqparat atalǵan eldiń Qazaqstandaǵy Elshiligine silteme jasap habarlaıdy.
Baıqaý 2016 jylǵy 2 jeltoqsandaǵy Ózbekstan Prezıdentiniń №2667 qaýlysy men Mınıstrler kabınetiniń tapsyrmasyna sáıkes ótkiziledi. Osyǵan oraı baıqaý ótkizýdiń erejesi ázirlengen. Onyń maqsaty Táýelsiz Ózbekstannyń negizin qalaýshy, kórnekti memleket qaıratkeri, ózbek halqynyń kóshbasshysy Islam Kárimovtiń eskertkishin jasaý úshin úzdik jobany irikteý. Eskertkish Tashkent qalasynda ornatylatyn bolady.
Baıqaý shartyna sáıkes, qatysýshylar Ózbekstannyń Kórkemóner akademııasynyń jáne uıymdastyrý komıtetiniń resmı saıtyna kelesi qujattar men aqparattyq materıaldardy ornalastyrýy qajet: baıqaý baǵdarlamasy men talaptary, Islam Kárimovtiń ómiri men qyzmeti týraly tarıhı anyqtamalar men iriktelgen sýretteri, eskertkish ornalastyrylatyn oryn, ýchaske sýreti, aýmaǵynyń bas jospary. Baıqaýǵa arnalǵan jumystar qazylar alqasyna 2017 jyldyń 31 naýryzyna deıin usynylýy qajet.
Halyqaralyq shyǵarmashylyq baıqaýynyń nátıjesi Ózbekstannyń Kórkemóner akademııasynyń jáne uıymdastyrý komıtetiniń resmı saıtynda jarııa etiletin bolady.
Aıta keterligi, Islam Kárimovtiń eskertkishi Máskeýde, Ózbekstan konsýldyq bólimshesine taqaý ornalasqan gúlzarda da boı kóterýi múmkin.
Ózbekstannyń birinshi prezıdenti Kárimov aǵymdaǵy jyly 78 jasqa qaraǵan shaǵynda ómirden ozdy. Ol musylman dástúrimen týǵan jeri Samarqandta jerlendi.
