Islam Karımov qaı qyrymen el esinde qaldy?
ASTANA. QazAqparat - Ózbekstannyń tuńǵysh prezıdenti Islam Karımov 2 qyrkúıek kúni Tashkentte ómirden ótti.
Islam Karımov 1989 jyldyń 23 maýsymynan 2016 jyldyń 2 qyrkúıegine deıin eldi basqardy. Ol sonaý Keńes zamanynda Respýblıkalyq kompartııanyń Ortalyq komıtetiniń birinshi hatshysy retinde bılik tizginin qolǵa alǵan.
«Ózbekstannyń tuńǵysh prezıdenti Islam Karımov - uly tarıhı tulǵa, sol kisiniń arqasynda bizdiń respýblıkamyz táýelsizdigin alyp, táýelsiz damý jolynda zor jetistikterge jete bildi, jas memleketimizdiń qıyn-qystaý kúnderinde soǵys qaýpinen aman qalyp, jaǵdaı turaqty qalypta saqtaldy», - dep eske alady el úkimeti men parlamentiniń ókilderi.
Karımovtyń el basyna kelgen ýaqyty Keńes áskerin 1989 jyly Aýǵanstannan shyǵarý týraly sheshim qabyldanǵan ýaqytpen tuspa-tus keldi. Ol kezde aýǵan elinde azamattyq soǵys áli de júrip jatqan bolatyn; 1992 jyly Tájikstanda etnıkaaralyq qaqtyǵys bolyp, qantógis bastaldy. Ózbekstan basshysy osy oqıǵalardyń barlyǵynda da eldi óńirlik qaqtyǵystarǵa aralastyrmaı alyp shyǵa aldy jáne elde saıası turaqtylyqty saqtaı bildi, dep jazady TASS.
«Burynǵy totalıtarlyq rejim kezinde álem osyndaı tamasha memlekettiń, ózbek sekildi qaıyrymdy ulttyń baryn bildi me?» - degen bolatyn Islam Karımov táýelsizdik kúnine oraı sóılegen sóziniń birinde.
Islam Karımovtyń el bılegen ýaqytynda memleket kóptegen halyqaralyq uıymdardyń músheligine ótti: TMD (1991), BUU(1992), EQYU(1992), HVQ(1992), ShYU(2001). Osyǵan qaramastan memleket negizinen óziniń syrtqy saıasatynda tym ashyq bolýǵa basymdyq berýden boıyn alys ustaı otyryp, ekijaqty qarym-qatynastyń damýyna jol saldy.
«Búgingi tańda bir ǵana qarapaıym nárseni uǵynýymyz kerek: búgingi tańda bizdiń aldymyzǵa qoıǵan eń uly maqsattarymyz - bizdiń elimizdiń jarqyn bolashaǵy, eldiń erteńi, erkin ómir, amanshylyq jáne 21 ǵasyrda Ózbekstan álemdik qaýymdastyqta qandaı oryn alatyny, - osynyń barlyǵy áýeli jańa býynǵa baılanysty bolady», - degen edi Islam Karımov.
Táýelsizdik jyldarynda Ózbekstan ekonomıkasy 6 ese ósti. Ónerkásiptiń úlesi 14 paıyzdan 34 paıyzǵa deıin ulǵaıdy. Bolyp jatqan jahandyq qarjy-ekonomıkalyq daǵdarysqa qaramastan sońǵy 11 jyl ishinde eldiń jalpy ishki ónimi (JІÓ) kóptegen elderdiń qatarynda - 8 paıyzdyq deńgeıde (ósim) saqtalýda.
«Táýelsizdik jyldarynda biz árqashan alys jáne jaqyn sheteldermen áýeli ózara syılastyq pen bir-biriniń ulttyq múddelerin eskerý negizinde qarym-qatynas qalyptastyrdyq. Budan bylaıǵy ýaqytta da osy barlyq eldermen ózara yqpaldastyqty jáne dostyq qarym-qatynasty nyǵaıta túsýdi kózdeıtin saıasatty ustanatyn bolamyz», - dep atap ótken Islam Karımov.
QR Prezıdenti Nursultan Nazarbaev óziniń kóńil aıtý jedelhatynda eldiń ekonomıkalyq áleýetiniń damýyna, onyń halyqaralyq bedeliniń ósýine, qoǵamnyń ál-aýqatynyń artýyna yqpal etken aýqymdy ózgeristerdiń júzege asyrylýy Ózbekstan Respýblıkasy táýelsizdiginiń bastaýynda turǵan Islam Karımovtiń esimimen baılanysty ekenin atap ótken edi.
«Ol óziniń búkil ómirin týǵan halqyna qaltqysyz qyzmet etýge arnady, árdaıym Qazaqstannyń senimdi dosy boldy jáne bizdiń halyqtarymyzdyń arasynda dostyq pen tatý kórshiliktiń nyǵaıa túsýine úlken úles qosty», - delingen jedelhatta.
