Islam yntymaqtastyǵy uıymy Batys jaǵalaýdaǵy jaǵdaıǵa baılanysty shuǵyl otyrys ótkizedi

ASTANA. KAZINFORM — Syrtqy ister mınıstrleri Iordan ózeniniń Batys jaǵalaýyna qatysty Izraıldiń qadamdaryna qarsy áreket etý joldaryn talqylaıdy, dep habarlaıdy Kazinform agenttiginiń menshikti tilshisi.

Islam yntymaqtastyǵy uıymy Izraıl jarııalaǵan egemendikti ornatý umtylysyna baılanysty Syrtqy ister mınıstrleri deńgeıinde Atqarý komıtetiniń ashyq formattaǵy shuǵyl otyrysyn shaqyryp otyr. Jıyn 26 aqpanda Djıdda qalasynda ótedi dep josparlanǵan.

Uıymnyń málimdeýinshe, kezdesý zańsyz sheshimder men Izraıldiń okkýpatsııalyq bıliginiń áreketterine qarsy ustanymdardy úılestirýge jáne naqty qadamdardy talqylaýǵa baǵyttalǵan.

— Sońǵy sheshimderdiń biri — «memlekettik menshik» degen jeleýmen okkýpatsııalanǵan Batys jaǵalaýda jerlerdi tirkeý protsesin bastaý. Bul palestınalyq aýmaqtardyń quqyqtyq, saıası jáne demografııalyq mártebesin ózgertýge jáne «eki memleket» qaǵıdatyn álsiretýge baǵyttalǵan zańsyz josparlardyń bir bóligi retinde baǵalanyp otyr, — delingen IYU habarlamasynda. 

Izraıl mınıstrler kabıneti 1967 jyldan beri alǵash ret Batys jaǵalaýda jerlerdi tirkeý protsesin iske qosýdy maquldady. Buǵan deıin eldiń qaýipsizdik kabıneti atalǵan aýmaqta ızraıldik baqylaýdy keńeıtýge baǵyttalǵan qosymsha sharalardy bekitken bolatyn. Atalǵan sheshimder arab jáne musylman elderiniń ortaq narazylyǵyn týǵyzdy.