Islam yntymaqtastyǵy oıyndarynda kimderge senim artamyz

ASTANA. KAZINFORM – Aldaǵy qarashanyń 7–21 kúnderi aralyǵynda Saýd Arabııasynyń Ar-Rııad qalasynda VI Islam yntymaqtastyǵy oıyndary ótedi. Atalǵan dodada qazaqstandyq sportshylar da baq synaıdy.

Eki aptaǵa sozylatyn bási bıik jarysta 24 sport túrinen jalpy 270 medal jıyntyǵy sarapqa salynady. 

Osymen 6-shi ret alaýy tutanǵaly otyrǵan synda bıyl alǵash ret djıý-djıtsý men mýaıtaı sport túrlerinen de medaldar oınatylady.

Esterińizge sala ketsek, alǵashqy oıyndar 2005 jyly Saýd Arabııasynda uıymdastyryldy. Oǵan barlyq qurlyqtan sportshylar qatysty. Atap aıtsaq, Afrıkadan – 27 el, Azııadan – 25, Eýropadan – 3 jáne Ońtústik Amerıkadan – 2 memlekettiń úzdik sportshylary baq synady.
Ekinshi oıyndar ótkizilmeı qalsa, úshinshi oıyndar 2013 jyly Indonezııanyń Palembang qalasynda ótti. Tórtinshi oıyndar 2017 jyly Bakýde (Ázerbaıjan), al besinshisi 2022 jyly Konıada (Túrkııa) uıymdastyryldy. Bıyl, 20 jyl ótken soń, Saýd Arabııasy qaıtadan jarys qojaıyny atanyp otyr.

Qazirgi tańda el halyqaralyq jarystardy belsendi túrde ótkizip keledi. Saýd Arabııasy 2029 jylǵy qysqy Azııa oıyndaryn, 2034 jylǵy jazǵy Azııa oıyndaryn jáne fýtboldan álem chempıonatyn qabyldaý quqyǵyna ıe. Sonymen qatar el 2036 jylǵy jazǵy Olımpıadany ótkizýge de úmitker.

Al aldaǵy kúnderi atalǵan jarysta el namysyn kimder qorǵamaq? Olardyń qatarynda el senim artqan qandaı sportshylar bar? Osy suraqtarǵa qysqasha jaýap izdep kórsek.
QR týrızm jáne sport mınıstrliginiń taratqan málimetterine súıensek, atalǵan jarysqa Qazaqstan sapynan 98 sportshy qatyspaq. Olardyń 48-i er, 50-i áıel sportshylar. Otandastarymyz 15 sport túri boıynsha baq synaıdy. Qatysýshylar sany jaǵynan bizdiń qurama 57 eldiń ishinde 10-orynda tur.

Olardyń qatarynda jeti álem chempıony men Olımpıada oıyndarynyń júldegeri de bar.
Atap aıtsaq, Nurǵısa Ádiletuly men Artem Antropov (aýyr atletıka), Rızabek Aıtmuhan jáne Nurqoja Qaıpanov (erkin kúres), Ramazan Qusaıynov pen Jibek Qulymbetova (djıý-djıtsý), Ábil Ǵalıev (mýaıtaı), sondaı-aq Tokıo Olımpıadasynyń qola júldegeri Sofıa Berýltseva (karate WKF) bar. Qazaqstan quramasynan eń kóp sportshy dzıýdo (11 adam), jeńil atletıka (10) jáne djıý-djıtsýdan (9) qatysady.

Esterińizge sala ketsek, Qazaqstan sportshylary osyǵan deıin, Islam yntymaqtastyǵy oıyndarynyń tarıhynda jalpy 134 medal jeńip alǵan. Onyń 42-si altyn, 36-sy kúmis jáne 56-sy qola medal.

Altyn medal sany boıynsha kóshbasshy sport túri — júzý (17 altyn). Odan keıin aýyr atletıka (8), velotrek (5), kıkboksıng (4), boks (2), gımnastıka (2), karate (2), jeńil atletıka (1) jáne kúres (1) túrleri keledi.

2021 jyly Túrkııanyń Konıa qalasynda ótken sońǵy oıyndarda Qazaqstan quramasy 27 altyn, 23 kúmis jáne 39 qola medal jeńip alyp, jalpykomandalyq esepte besinshi orynǵa ıe boldy.

Esterińizge sala ketsek, osyǵan deıin, Islam yntymaqtastyǵy oıyndarynda karateden Qazaqstan namysyn kimder qorǵaıtyny týraly jazǵan bolatynbyz.