Islam ǵalymdary Palestına terrıtorııasyn qaıtarý quqyǵyna arnalǵan qujatqa qol qoıdy
ASTANA. 14 mamyr. QazAqparat - Arab jáne musylman áleminiń 15 memleketinen elýge tarta ǵalym palestınalyqtardyń jerine qatysty álem musylmandarynyń ymyrasyz ustanymyn tanytatyn «Qaıtaryp alý quqyǵy jónindegi qujatqa» qoldaryn qoıdy.
Ǵalymdar atalmysh qujatqa «Sheıittiń qany - ǵalymnyń haty» dep atalatyn keń aýqymdy qoǵamdyq aktsııa kezinde qol qoıǵanyn aıta ketý kerek. Shara ótken beısenbide Gaza sektorynda HAMAS qozǵalysynyń qoldaýymen ótti. Bul týraly muslim.kz. saıty jazady.
ІUMS Online habarlaǵandaı, Izraıldiń ezgisi men tepkisinen kóz ashpaǵan palestınalyqtarǵa qoldaý kórsetýge arnalǵan atalmysh qujatqa qol qoıý rásimine Halyqaralyq musylman ǵalymdary odaǵynyń (IUMS) jetekshisi Júsip ál-Qardaýı de qatysyp, osynaý sharanyń bási men mańyzdylyǵyn arttyra túsken. Ol óz sózinde palestınalyqtardyń Jaratqannan basqa jatqa tizesin búkpegen ór halyq ekenin aıta kele, Izraıldiń Palestına jerine kóz alartatyndaı qandaı da bir quqyǵy joqtyǵyn alǵa tartypty. «Olarǵa qaraǵanda bul jerdi ıelenýge bizdiń quqyǵymyz bar. Bul jerdi bizge Omar ıbn ál-Hattab hrıstıandardan alyp bergen bolatyn», - degen sheıh aǵylshyndarǵa arqa súıegen sıonısterdiń Palestına aýmaǵyn kúshpen tartyp alǵanyn tilge tıek etti. Sondaı-aq, ol sózinde osy kúres jolynda palestınalyqtardyń kóp qurbandyqqa barǵanyn, sol sebepti, olarǵa bir jeńnen qol, bir jaǵadan bas shyǵarýdyń qajettiligine toqtaldy. «Biz Gaza sektory men Batys jaǵalaý turǵyndarynyń tatýlasýyna kúsh salýymyz kerek. Bir halyqtyń ishten bólinip, bir-birimen jaýlasýyna jol bermeýimiz qajet. Olar jeńiske jetýi úshin birigýi tıis. Palestına búkil arab áleminiń kún tártibinen túspeı turǵan basty másele bolyp tabylady. «Arab kóktemi» de osy Palestına úshin bolǵanyn aıta ketý kerek. Ál-Aqsa meshiti tek palestınalyqtar men arabtarǵa ǵana emes, sonymen birge, búkil musylman úmbetine tıesili», - degen edi ol óz sózinde.
