Islam elderi «Rafah» ótkizý pýnktiniń tek bir baǵytta jumys isteýine qarsy shyqty
ASTANA. KAZINFORM — ASTANA. KAZINFORM — Segiz arab jáne ıslam memleketi Izraıldiń «Rafah» baqylaý-ótkizý pýnktiniń birjaqty ashylatyny týraly málimdemesine qatysty tereń alańdaýshylyq bildirdi. Bul týraly Qatar Syrtqy ister mınıstrligine silteme jasaı otyryp Kazinform menshikti tilshisi habarlady.
Qatar, Mysyr, Iordanııa, BAÁ, Indonezııa, Pákistan, Túrkııa jáne Saýd Arabııasynyń syrtqy ister mınıstrleri birlesken málimdeme jasap, Izraıldiń gazalyqtardyń Mysyrǵa barýyna múmkindik berý úshin «Rafah» baqylaý-ótkizý pýnktin bir baǵytta ashatyny týraly málimdemesine tereń alańdaýshylyq bildirdi.
— Syrtqy ister mınıstrleri Palestına halqyn óz jerlerinen qýyp shyǵarýǵa baǵyttalǵan kez kelgen árekettiń qabyldanbaıtynyn atap ótti. Mınıstrler AQSh prezıdenti Donald Tramptyń qozǵalys erkindigin qamtamasyz etý úshin «Rafah» ótkelin eki baǵytta da ashý josparyn tolyq oryndaý qajettiligin atap ótti, — delingen birlesken málimdemede.
Osyǵan deıin Izraıl jaqyn kúnderi Gaza sektorynyń syrtqa shyǵatyn jalǵyz núktesi — «Rafah» shekara ótkelin birjaqty túrde tek Gazadan Mysyrǵa shyǵatyn baǵytta ashýdy josparlap otyrǵanyn jazǵan bolatynbyz.
Habarlamada sheshim «atysty toqtatý kelisimine jáne saıası basshylyq nusqaýlaryna sáıkes» qabyldanǵany aıtylǵan. COGAT málimdemesine sáıkes, ótkel tek bir baǵytta — Gazadan Mysyrǵa ashylady.
AQSh prezıdenti Donald Tramp Gaza josparynyń ekinshi kezeńi jaqynda oryndalatynyn aıtty. Alaıda naqty ýaqytyn jarııalamady.
Qatar memleketi Gaza sektoryndaǵy atysty toqtatýdy qamtamasyz etý úshin kúsh salýdy jalǵastyryp keledi. Qatar oq atýdy toqtatý rejımi saqtalsa, kelisimniń ekinshi kezeńine kóshýge múmkindik bar úmittenedi.
Eske sala ketsek, qazan aıynda AQSh prezıdenti Donald Tramp pen Mysyr, Qatar men Túrkııa basshylary Gazada atysty toqtatý týraly kelisimderdi bekitetin qujatqa qol qoıdy. Qol qoıý rásimi Qyzyl teńiz jaǵalaýynda Mysyrdyń kýrortty Sharm-esh-Sheıh qalasynda 13 qazan kúni bastalǵan «Beıbitshilik — 2025» halyqaralyq sammıtiniń aıasynda ótti.