Islam dinine ekstremızm men lańkestikti telý nadandyq - «Nur Astana» meshitiniń bas ımamy
ASTANA. 19 shilde. QazAqparat - Islam dinine ekstremızm men lańkestikti telý nadandyq. Bul týraly búgin BAQ ókilderine baspasóz máslıhatyn ótkizgen elordadaǵy «Nur Astana» meshitiniń bas ımamy Qalıjan Zańqoev aıtty.
«Din men ekstremızm degen sóz eki basqa, bir-birine úsh qaınasa sorpasy qosylmaıdy. Óıtkeni bizdiń qasıetti Quran kárimde «bir adam balasynyń janyna qastandyq jasaý, búkil adamzattyń janyna qastandyq jasaýmen teń» deıdi. Quran jolyn ustanǵan adamdar ekstremıstik is-áreketke barmaıdy. Al ony jasap jatqandar bolsa, olar sodyrlar. El sodyrsyz bola ma? Qaıta biz shúkirshilik qylaıyq», - dedi ol.
Bul rette bas ımamnyń paıymynsha, ıslamǵa túrli jat áreketterdi telý batystyń iritki salýynan týyndap otyr. Jalpy, ıslam degen sózdiń qasyna ekstremızm, terrorızm degen sózdi qoıý nadandyq, saýatsyzdyq.
«Qoǵamda ondaı sodyrlyq áreketter bolmaı jatyr dep aıtpaımyn, bolyp ta jatyr. Biraq ony ıslammen baılanystyra berýdiń qajeti joq. Kishkene saqal qoıyp, balaǵyn qysqartyp alǵan adam istese de ony ıslammen baılanystyrmaý kerek. Ol da - zombı. Ony da bireý jaman iske baǵyttap otyr», - dedi Q.Zańqoev.
