Islam dini týraly jazý úshin jýrnalıster kem degende Qurandy oqyǵan bolýy kerek - sarapshy
ASTANA. QazAqparat - Qazaqstan halqynyń 70 paıyzy musylman bolǵandyqtan, asyl dinimiz - ıslam men ıslamdy jamylyp, búlik týdyryp júrgen uıymdardy ajyrata bilý úshin jýrnalıster Quran Kárimdi oqyp alǵany jón, - deıdi «Din salasyndaǵy ózekti máselelerdi jarııalaý jónindegi aqparattyq jumystyń qaǵıdalary men basymdyqtary» atty trenıng barysynda «Qazmedıa ortalyǵy» basqarý kompanııasynyń janyndaǵy medıamekteptiń basshysy Dana Rysmuhamedova.
«Qazaqstan halqynyń 70 paıyzy musylman bolǵandyqtan, sýnnıt pen shııttiń, salafıt pen ýahabshynyń kim ekenin ajyrata bilý úshin jýrnalıster asyl dinimiz - ıslamdaǵy túsinikterden jalpylama habardar bolý kerek. Meniń oıymsha, jýrnalıster tym bolmaǵanda Qurandy oqyp shyǵýy kerek. Sebebi, ıslam dinindegi alaýyzdyq osy bilmestikten týyndaıdy. Qurandy bilgen jýrnalıst «ıslam dini mynany mindet etti» degen jalǵan aqparat berýshige «joq, qasıetti Quranda bul joq» dep tótep bere alady. Din salasyna jazý úshin oqý kerek, zertteý kerek jáne sony taldaýdan ótkizý kerek», - deıdi sarapshy.
D.Rysmuhamedovanyń aıtýynsha, dinge qatysty kez kelgen aqparatty resmı organdardan rastap alý kerek.
«Din isteri komıteti, Qazaqstan musylmandary dinı basqarmasy bar, sondyqtan ózge salalardan qaraǵanda, din máselesin jazarda jýrnalıster resmı málimdemege júgingeni durys», - dedi sózin qoryta ol.
