Islam dini - bul naǵyz demokratııa - Bas múftı Erjan qajy Malǵajyuly
ASTANA. 22 qarasha. QazAqparat - Islam dini - bul naǵyz demokratııa. Búgin Astanadaǵy Áziret Sultan meshitinde «Bas redaktorlar klýby» múshelerimen kezdesý barysynda Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly osylaı málim etti.
Júzdesý barysyndaǵy áńgimede Bas múftı basqarma janynan aqparattyq nasıhat toby qurylǵanyna toqtalyp, onyń qyzmetine de nazar aýdarǵan bolatyn. «Shynyn aıtý kerek, elimizdiń óńirlerinde dástúrli dinniń ne ekenin, aǵymnyń ne ekenin bilmeıtinder jetkilikti. Sondyqtan da, aqparattyq nasıhat toby halyqty dástúrli ıslammen aqparattandyrýdy qolǵa alyp jatyr. «Islam dini - naǵyz demokratııa. Sondyqtan da, biz aǵymnyń qandaı ekenin, onyń zalaly men zııany qandaı bolatynyn ajyratyp aıtýǵa tıispiz. Aqparattyq nasıhattyq toby adasyp júgen baýyrlarymyzben jeke otyryp, saǵattap áńgime aıtýǵa barady», - dedi Erjan qajy Malǵajaruly.
Bas múftıdiń aıtýynsha, aqparattyq nasıhat tobynyń júrgizgen jumysy nátıjesinde bir ǵana Jezqazǵan qalasynan 34 adam adasqanyn moıyndap, dástúrli dinge qaıta oralmaq.
«Aqparattyq nasıhattyq toptyń qyzmetimen bizdiń múftııattyń saıtynan da habardar bolyp, olardyń eldiń qaı óńirinde, qaı aýylda júrgenin bilip otyrýǵa bolady. Degenmen, barsha jumystarǵa eldegi buqaralyq aqparat quraldarynyń tıgizetin paıdasy zor», - dedi Bas múftı.
