Islam damý banki Qazaqstandaǵy birqatar jobalarǵa qarajat bólýdi jalǵastyrýǵa nıetti

NUR-SULTAN. QazAqparat - Memleket basshysy Islam damý bankiniń prezıdenti Muhammed Sýleıman Ál-Djasserdi qabyldady, dep habarlaıdy Aqordanyń baspasóz qyzmeti.

Prezıdent Qasym-Jomart Toqaev Islam damý bankiniń basshysy Muhammed Sýleıman Ál-Djassermen ekonomıkanyń túrli salalaryndaǵy birqatar birlesken jobalardyń júzege asyrylý barysyn talqylady.

Memleket basshysy Qazaqstannyń TMD elderi ishinde Islam damý bankimen seriktestik baǵdarlamasyn birinshi bolyp ázirlegen el ekenin eske saldy. Almatyda 25 jyldan astam ýaqyt buryn ornalasqan aımaqtyq keńse Shyǵys Eýropa elderinde, TMD, Monǵolııa jáne Qytaıda bank operatsııalaryn úılestiredi. Bul Qazaqstan men Islam damý banki arasyndaǵy joǵary mańyzdylyq pen ózara senimdi qarym-qatynasty bildiredi.

– Biz Banktiń Qazaqstan ekonomıkasyna kóp jyldan beri kórsetip kele jatqan qoldaýyn joǵary baǵalaımyz. Islam damý banki yntymaqtastyq ornatqan jyldar ishinde elimizdegi ekonomıkanyń basym sektorlary men áleýmettik jobalarǵa 1,6 mıllıard dollardan astam ınvestıtsııa saldy, – dedi Memleket basshysy.

Ál-Djasser Memleket basshysyna Banktiń ınvestıtsııalar salasyndaǵy saıasat jáne aldaǵy kezeńdegi josparlary jóninde aıtty. Onyń aıtýynsha, Islam damý banki bıznes, qarjy salalaryndaǵy jobalarǵa, sondaı-aq ınfraqurylym men kommýnıkatsııalardy jańǵyrtýǵa qarajat bólýdi jalǵastyrýǵa nıetti.

Foto: akorda.kz