Islam damý banki tobynyń otyrysynda jańa qarjylyq kelisimder jasaldy
ASTANA.KAZINFORM — Ázerbaıjan astanasy Baký qalasynda Islam damý banki tobynyń 51-shi jyl saıynǵy otyrysy bastaldy. Іs-sharaǵa ondaǵan eldiń úkimet ókilderi, halyqaralyq qarjy uıymdary, ınvestıtsııalyq qorlar men bıznes qaýymdastyqtarynyń músheleri qatysyp jatyr.
Alǵashqy kúnniń negizgi oqıǵalarynyń biri Ázerbaıjannyń Ekonomıka mınıstrligi men Eksport pen ınvestıtsııalardy yntalandyrý agenttiginiń qoldaýymen uıymdastyrylǵan Investıtsııalyq forým boldy.
Forým barysynda eldiń ınvestıtsııalyq ahýaly, ınfraqurylymdy damytý, jyljymaıtyn múlik naryǵy, jańartylatyn energııa kózderi, sondaı-aq «jasyl» qarjylandyrý men óńirlik yntymaqtastyq máseleleri talqylandy.
Forýmnyń ashylýynda sóz sóılegen Ázerbaıjannyń ekonomıka mınıstri Mıkaıl Djabbarov bul shara halyqaralyq ekonomıkalyq yntymaqtastyqty keńeıtýge jáne ıslamdyq qarjy ınstıtýttarymen seriktestikti nyǵaıtýǵa yqpal etetinin atap ótti.
Jıyn aıasynda Islam damý banki tobyna kiretin Halyqaralyq ıslamdyq saýda qarjylandyrý korporatsııasy jalpy quny 260 mıllıon dollar bolatyn birqatar kelisimderge qol qoıdy.
Olardyń ishindegi eń irisi — Gambııamen jasalǵan úsh jyldyq negizdemelik kelisim. Quny 250 mıllıon dollar bolatyn bul qujat energetıka, azyq-túlik qaýipsizdigi, densaýlyq saqtaý, aýyl sharýashylyǵy jáne jeke sektordy qoldaýdy kózdeıdi.
Sonymen qatar Tájikstanmen maqta jáne maqta ónimderiniń saýdasyn qoldaý úshin 10 mıllıon dollar bólý týraly kelisim jasaldy. Qarajat fermerlerden shıkizat satyp alýǵa jáne salanyń eksporttyq áleýetin arttyrýǵa baǵyttalady.
Budan bólek, Halyqaralyq qarjy korporatsııasy men yntymaqtastyq týraly kelisimge qol qoıyldy. Qujat Islam yntymaqtastyǵy uıymyna múshe elderde saýda qarjylandyrýyna qoljetimdilikti keńeıtýge baǵyttalǵan.
Islam damý banki tobynyń jyl saıynǵy otyrysy Bakýde 19 maýsymǵa deıin jalǵasady. Bıylǵy jıyn «Turaqty ál-aýqat jolyndaǵy óńirlik ıntegratsııa» uranymen ótýde.
Forým ınvestıtsııalar, ekonomıkalyq yntymaqtastyq jáne ornyqty damý máselelerin talqylaıtyn mańyzdy halyqaralyq alań retinde qyzmet etedi.
Eske salaıyq, bıyl mamyr aıynda Bakýde «Barshaǵa baspana: qaýipsiz jáne turaqty qalalar men eldi mekender» taqyrybymen WUF13 halyqaralyq forýmy ótken bolatyn.
Aıta keteıik, Islam damý banki Qazaqstandaǵy arnaıy ekonomıkalyq aımaq ınfraqurylymyna $1,3 mlrd bóledi.
