Islam damý banki elimizdiń sý sharýashylyǵyna 1 mlrd dollardan astam ınvestıtsııa quıady
ASTANA. KAZINFORM – Búgin Astanada arab úılestirý tobynyń otyrysy ótti. Onyń barysynda Islam damý banki elimizdiń sý sharýashylyǵy salasyna qarjy bóletini belgili boldy.
«Biz búgin arab úılestirý tobymen jumysty bastadyq. Onyń quramyna Islam damý banki jáne Parsy shyǵanaǵy elderiniń aldyńǵy qatarly ınvestıtsııalyq kompanııalary kiredi. Aldymen sý sharýashylyǵyn ınvestıtsııalaý kelisimine qol qoıyldy. Bıyl tasqyn saldarynan bul salaǵa zalal keldi, 2-3 jyldyń ishinde sý júıesin qalpyna keltirýdi josparlap otyrmyz. Bul aldaǵy ýaqytta tasqyn sýmen tıimdi kúresýge múmkindik beredi. Islam damý banki bastapqyda 1 mlrd-tan astam dollar qarjy quıady», - dedi QR Premer-Mınıstrdiń orynbasary – Ulttyq ekonomıka mınıstri Nurlan Baıbazarov dóńgelek ústel barysynda BAQ ókilderiniń saýalyna jaýap berip.
Ulttyq ekonomıka mınıstriniń paıymdaýynsha, qarjylandyrý tıimdi ári uzaqmerzimdi (kem degende 20 jyl).
«Jalpy búgingi kezdesýde biz arab úılestirý tobyna 10 mlrd dollardan astam somaǵa 250 ınvestıtsııalyq jobany usyndyq. Bul aýqymdy jumystyń basy ǵana, elimiz úshin tıimdi ınvestıtsııa tartamyz dep úmittenemiz», - deıdi ol.
Aıta ketsek, arab úılestirý tobynyń otyrysyna Islam damý bankiniń, OPEK halyqaralyq damý qorynyń, Kýveıt arab ekonomıkalyq damý qorynyń, Saýd Arabııasy damý qorynyń, Abý-Dabı damý qorynyń jáne Katar damý qorynyń basshylary, sondaı-aq Qazaqstan Respýblıkasynyń memlekettik organdarynyń ókilderi qatysty.
