Islam damý banki múshe elderge 2,8 mlrd dollar bóledi
ASTANA. KAZINFORM — Bakýde ótken Islam damý banki tobynyń jyl saıynǵy jıyny aıasynda Banktiń Atqarýshy dırektorlar keńesi uıymǵa múshe elderdegi ınfraqurylymdyq, energetıkalyq jáne aýyl sharýashylyǵy jobalaryn iske asyrý úshin jalpy kólemi 2,8 mlrd AQSh dollaryn quraıtyn qarjylandyrý paketin maquldady.
Eń iri qarjylandyrý kólemi Ýgandaǵa baǵyttalady. Bul elde Malaba — Kampala temirjol jelisiniń qurylysyn júrgizýge 650,75 mln eýro bólinedi. Joba kólik ınfraqurylymyn damytýǵa, logıstıkalyq shyǵyndardy azaıtýǵa jáne shamamen úsh myń jańa jumys ornyn ashýǵa múmkindik beredi.
Túrkııaǵa Stambuldyń Soltústik temirjol ótkeli jobasyn júzege asyrý úshin 660,35 mln eýro bólý maquldandy. Atalǵan joba megapolıstiń Eýropa jáne Azııa bólikteri arasyndaǵy kólik baılanysyn kúsheıtip, júk tasymalynyń tıimdiligin arttyrýdy kózdeıdi.
Tájikstanǵa Rýshan — Varshez avtomobıl jolyn qaıta jańǵyrtýǵa 93,8 mln dollar bólinedi. Bul óńirdegi kólik qatynasyn jaqsartyp, saýda múmkindikterin keńeıtýge yqpal etedi.
Energetıka salasynda da birqatar iri jobalar qoldaý tapty. Nıgerııanyń Nıger shtatynda kún energetıkasyn damytýǵa 150 mln dollar bólinse, Kot-d’Ivýarǵa energetıkalyq ınfraqurylymdy jańǵyrtý jáne halyqtyń elektr energııasyna qoljetimdiligin keńeıtý úshin 86,55 mln eýro qarastyrylǵan. Al Palestınada kún elektr stantsııalaryn salýǵa 22 mln dollar baǵyttalady.
Eń iri qarjylandyrý kólemi — 1,004 mlrd dollar Bangladeshke bólindi. Qarajat Eastern Refinery munaı óńdeý zaýytyn jańǵyrtý men keńeıtýge jumsalady. Joba eldiń energetıkalyq qaýipsizdigin nyǵaıtyp, munaı ónimderiniń ishki óndirisin arttyrýǵa múmkindik beredi.
Agrarlyq sektorda Gambııa mal sharýashylyǵynyń ónimdiligin arttyrý jáne azyq-túlik qaýipsizdigin kúsheıtý úshin 30 mln dollar alady. Al Benınge turaqty aýyl sharýashylyǵyn damytý jáne fermerlik sharýashylyqtardyń klımattyq ózgeristerge tózimdiligin arttyrý maqsatynda 19,17 mln eýro bólinedi.
Bank ókilderiniń aıtýynsha, maquldanǵan jobalar Bakýdegi jyl saıynǵy jıynnyń negizgi taqyryby — «Turaqty ál-aýqat jolyndaǵy óńirlik ıntegratsııa» qaǵıdatyna sáıkes keledi. Olar kólik baılanysyn damytýǵa, energetıkalyq qaýipsizdikti nyǵaıtýǵa, azyq-túlik júıelerin jetildirýge jáne múshe memleketterdiń turaqty ekonomıkalyq ósimin qamtamasyz etýge baǵyttalǵan.
Aıta keteıik, Islam damý banki Qazaqstandaǵy arnaıy ekonomıkalyq aımaq ınfraqurylymyna $1,3 mlrd bóledi.
