Islam damý banki Qazaqstannyń sý salasyna $1,15 mlrd ınvestıtsııa salady
ASTANA. KAZINFORM – Islam damý banki Qazaqstannyń sý salasyna $1,15 mlrd ınvestıtsııa salady. Taraptar Bakýde ótip jatqan BUU-nyń Klımattyń ózgerýi jónindegi konferentsııasynda (COP29) tıisti kelisimge qol qoıdy. Premer-mınıstrdiń orynbasary – ulttyq ekonomıka mınıstri Nurlan Baıbazarov bul Islam damý bankiniń tarıhyndaǵy qarjylandyrǵan eń kólemdi jobasy ekenin atap ótti.
Sonymen qatar Islam damý banki (IDB) Qazaqstannyń sý salasyn damytýǵa $3,5 mln kóleminde óteýsiz grant bóldi.
Sondaı-aq IDB Sý resýrstary jáne ırrıgatsııa mınıstrligi ázirlegen «Klımat ózgerisine tózimdi sý resýrstaryn damytý» jobasyn iske asyrýǵa qatysady. Buǵan deıin taraptar Jobanyń birinshi kezeńi boıynsha kelissózder hattamasyna qol qoıǵan bolatyn.
Qarjylandyrylatyn jobanyń birinshi kezeńi Astana sý qoımasyn tolyqtyrý jónindegi jobany qosa alǵanda, 4 jańa sý qoımasyn salýdy jáne jumys istep turǵan 4 sý qoımasyn rekonstrýktsııalaýdy, 115 kanaldy rekonstrýktsııalaýdy jáne kúrdeli jóndeýdi qarastyrady. Qurylys jumystary Aqmola, Almaty, Jambyl, Qyzylorda, Túrkistan, Batys Qazaqstan, Jetisý oblystarynda jáne Astana qalasynda júrgiziledi.
Budan basqa, joba IDB men Mınıstrlik arasyndaǵy Qazaq Sý sharýashylyǵy ǵylymı-zertteý ınstıtýtynyń Sý jáne ózen basseınderiniń máselelerin zerdeleýdegi tehnıkalyq yntymaqtastyqty, sondaı-aq sý resýrstarynyń aqparattyq-taldaý ortalyǵy úshin erte den qoıý júıelerin engizýdi baǵalaýdy kózdeıdi.
Onyń ishinde «Qazsýshar» respýblıkalyq memlekettik kásipornyn tehnıkalyq jaraqtandyrý jáne sý resýrstaryn basqarýdy jetildirý úshin avtomattandyrý ortalyǵyn salý josparlanýda.
«Memleket basshysy sý salasyna ınvestıtsııa tartýdyń mańyzdylyǵyn birneshe ret atap kórsetti. Bizdiń aldymyzda sý ınfraqurylymyn jańǵyrtý jáne bolyp jatqan klımattyq ózgeristerge beıimdeý mindeti tur. Islam damý banki sııaqty bedeldi ınstıtýttyń qarjylandyrýy elimizge degen joǵary senimdi, júrgizilip jatqan ınvestıtsııalyq saıasat pen áleýmettik-ekonomıkalyq reformalardy kýálandyrady», - dep atap ótti Nurlan Baıbazarov.
