Islam damý banki Qazaqstanǵa 4,2 mlrd dollardan astam qarjy bólgen
ASTANA. KAZINFORM — Memleket basshysy Islam damý bankiniń prezıdenti Muhammed Sýleıman Ál-Djassermen kezdesti. Bul týraly Aqordanyń baspasóz qyzmeti málim etti.
Kezdesý barysynda Prezıdent Qasym-Jomart Toqaev Islam damý banki osy jyldar aralyǵynda Qazaqstannyń ulttyq damý basymdyqtaryn qoldaıtyn senimdi serikteske aınalǵanyn atap ótti.
— Búginge deıin Islam banki elimizge somasy 4,2 mıllıard dollardan astam qarjy bólgen. Al qazirgi jáne keleshektegi jobalar portfeli 3 mıllıard dollardan asady. Osy oraıda Memleket basshysy sý ınfraqurylymy, ózara kólik baılanysy jáne ındýstrııalyq damý salalaryndaǵy strategııalyq mańyzdy bastamalarǵa qoldaý kórsetkeni úshin qarjy ınstıtýtynyń jetekshisine rızashylyǵyn bildirdi. Atap aıtqanda, sońǵy jyldary IDB óz tarıhyndaǵy eń úlken qarjylandyrý paketin maquldady. Onyń aıasyna jalpy somasy 1,15 mıllıard dollar bolatyn Sý resýrstaryn damytý baǵdarlamasy, sondaı-aq Qazaqstannyń arnaıy ekonomıkalyq aımaqtary men ındýstrııalyq parkterindegi ınfraqurylymdy damytýdy kózdeıtin quny 1,3 mıllıard dollar negizdemelik kelisim kiredi, — delingen habarlamada.
Áńgimelesý barysynda 2027-2032 jyldarǵa arnalǵan jańa Strategııalyq seriktestik sheńberindegi yqpaldastyq máselesi talqylandy. Prezıdent elimizdiń IDB-men uzaqmerzimdi ınstıtýtsıonaldyq seriktestikti jolǵa qoıýǵa jáne qolaıly ınvestıtsııalyq saıasat júrgizýge beıil ekenin rastady. Sondaı-aq Memleket basshysy Islam damý banki toptarynyń jyl saıynǵy kezdesýin 2028 jyly Qazaqstanda ótkizý jónindegi usynysqa qoldaý bildirdi. Aýqymdy ınvestıtsııalyq is-sharaǵa Bankke múshe memleketter men qarjy ınstıtýttarynyń ókilderi, halyqaralyq ınvestorlar qatysady.
Buǵan deıin Memleket basshysy EQDB prezıdenti Odıl Reno-Bassony qabyldady.
Prezıdent VEON kompanııalar tobynyń bas atqarýshy dırektory Mýhterem Kaan Terzıoglýdy qabyldady. Kezdesý barysynda tsıfrlandyrý jáne jasandy ıntellekt tehnologııasyn engizý maqsattaryna saı telekommýnıkatsııa naryǵyn damytý perspektıvasy talqylandy. Memleket basshysy Qasym-Jomart Toqaev Qazaqstanda uzaq jyldan beri qyzmet etip kele jatqan VEON kompanııasynyń otandyq telekommýnıkatsııany jáne tsıfrlyq ekojúıeni órkendetýge qosqan úlesin joǵary baǵalady.
