Islam damý banki Qazaqstandaǵy arnaıy ekonomıkalyq aımaq ınfraqurylymyna $1,3 mlrd bóledi
ASTANA. KAZINFORM - QR Ónerkásip jáne qurylys mınıstri Ersaıyn Naǵaspaev Djıdda qalasyna (Saýd Arabııasy) jumys sapary aıasynda Islam damý bankiniń prezıdenti Muhammed Sýleıman ál-Djassermen kezdesti.
Ónerkásip jáne qurylys mınıstrligi baspasóz qyzmetiniń habarlaýynsha, kelissózder barysynda taraptar Qazaqstannyń qarjy ınstıtýttary men Islam damý banki yntymaqtastyǵynyń qazirgi jaı-kúıin, keleshegin, sondaı-aq ekonomıkanyń basym sektorlaryndaǵy ınvestıtsııalyq ózara is-qımyldy keńeıtý, onyń ishinde ónerkásiptik ınfraqurylymdy jáne ınjenerlik jelilerdi jańǵyrtý máselelerin talqylady.
Osy rette eldiń turaqty damýy men ınvestıtsııalyq tartymdylyǵyn arttyrýǵa baǵyttalǵan birlesken jobalardy júzege asyrýǵa erekshe nazar aýdaryldy.
Kezdesý qorytyndysy boıynsha IDB men Ónerkásipti damytý qory arasynda azat ekonomıkalyq aımaq (AEA) jáne ındýstrıaldy aımaq (IA) ınfraqurylymy qurylysy men jańǵyrtý isin qarjylandyrý úshin 1,3 mlrd AQSh dollary kóleminde qarajat tartý jónindegi negizdemelik kelisimge, sondaı-aq IDB men Qazaqstan Respýblıkasy Ónerkásip jáne qurylys mınıstrligi arasyndaǵy 1,3 mln AQSh dollary mólsherinde tehnıkalyq kómekke grant berý týraly kelisimge qol qoıyldy.
- Qol qoıylǵan qujattar aımaqtardyń ınfraqurylymyn jańǵyrtý úshin qarjylyq jáne ınstıtýtsıonaldyq berik negiz qalyptastyrady jáne Qazaqstan men Islam damý banki arasyndaǵy strategııalyq áriptestikti nyǵaıtýdaǵy mańyzdy qadam sanalady, – dep atap ótti Ersaıyn Naǵaspaev.
Aıta ketý kerek, Islam damý bankiniń granttyq qoldaýy AEA basqarý tetikterin jetildirýge, protsesterdi tsıfrlandyrýǵa, ákimshilendirýdiń zamanaýı standarttaryn engizýge, sondaı-aq basqarýshy kompanııalardyń kásibı quzyretterin arttyrýǵa baǵyttalady. Osy sharalardy iske asyrý ınvestıtsııalardy tartýǵa jáne eksportqa negizdelgen óndiristerdi damytýǵa baǵdarlanǵan aımaqtar jumys isteýiniń neǵurlym ashyq jáne tıimdi modelin qurýǵa múmkindik beredi.
Esterińizge sala keteıik, 2026 jylǵy 10 aqpanda Úkimettiń keńeıtilgen otyrysynda Qazaqstan Prezıdenti Qasym-Jomart Toqaev úsh aı ishinde arnaıy ekonomıkalyq aımaqtardy damytýdyń jańa modelin bekitýdi tapsyryp, olardyń áleýetin tolyqqandy paıdalaný qajettigin aıtqan.
Osy oraıda Memleket basshysy arnaıy ekonomıkalyq aımaqtar zamanaýı retteýshi normalar, jańa quraldar men servıstik sheshimder qoldanylatyn, keıinnen ulttyq deńgeıdegi tolyqqandy ınvestıtsııalyq platformaǵa aınalýǵa tıis ekenin atap ótken bolatyn.
Osyǵan deıin Qazaqstanda AEA-larǵa jeńildik jasaý tetikteri ózgeretini týraly jazdyq.