Islam bankteriniń qyzmetine qolaıly jaǵdaı jasaıtyn zań jobasy maquldandy - Májilis
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine saqtandyrý jáne ıslamdyq qarjylandyrý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy.
Atalǵan zań jobasynyń maqsaty ıslamdyq saqtandyrýdy engizý, ıslam bankteriniń qyzmetine edáýir qolaıly jaǵdaılar jasaý, saqtandyrý tólemderine kepildik berý júıesiniń turaqtylyǵy men qarjylyq ortalyǵyn qamtamasyz etý bolyp tabylady. Osymen qatar, zań jobasymen qyzmetkerdi eńbek mindetterin oryndaý kezinde jazataıym oqıǵalardan mindetti saqtandyrý jolymen Qazaqstanda tolyqqandy ıslamdyq qarjylandyrý júıesin qurý qarastyrylady.
Bul rette zań jobasymen ıslamdyq qarjylandyrý júıesin odan ári damytý úshin ıslamdyq saqtandyrýdy engizý qarastyrylyp otyr. Ádettegi saqtandyrý ıslamnyń saqtandyrý qaǵıdattaryna qaıshy keletini aıqyn. Bul ıslamdyq qarjy júıesiniń qatysýshylarynyń táýekelderin jabýǵa múmkindik bermeıdi. Osyǵan baılanysty qujatta ıslamdyq qarjylandyrýdyń negizgi qaǵıdattaryn zań deńgeıinde bekitý jáne ıslamdyq saqtandyrýdy yntalandyrý usynylady.
«Ekinshi oqylymǵa ázirleý barysynda depýtattar tarapynan keıbir normalardy jetildirýge baǵyttalǵan birqatar túzetýler jasaldy. Atap aıtqanda, saqtandyrý boıynsha biryńǵaı derekqor júıesin qalyptastyrý, ıslamdyq saqtandyrý uıymynyń qyzmetine qoıylatyn talaptardy naqtylaý, ıslamdyq lızıng pen negizgi qaǵıdattaryn engizý men aıqyndaý, sondaı-aq, ıslamdyq bank operatsııalaryn jasaý tártibi men talaptaryn ońaılatý bolyp tabylady», - deıdi depýtat Nurtaı Sabılıanov.
Onyń aıtýynsha, zań jobasymen bankterdegi ulttyq valıýtadaǵy depozıtterge kepildik kólemin 5 mln. teńgeden 10 mln. teńgege deıin ulǵaıtý qarastyrylady. Al shetel valıýtasyndaǵy depozıt kólemi 5 mln. teńge shamasynda qalady.
Májilis maquldaǵan zań jobasy Senatqa joldanady.
