«Islam bankınginiń» atyn jamylǵan alaıaq tutyldy
ASTANA. 16 naýryz. QazAqparat /Qanat Mámetqazyuly/ - Kereký qalasynyń turǵyny paıyzsyz nesıe berý qaǵıdatyna negizdelgen «ıslam bankınginiń» atyn jamylyp, jurtty aldaǵan.
Alaıaqtyń áreketi áshkere bolyp, ol úsh jylǵa bas bostandyǵynan aıyryldy. Bul týraly QazAqparat Bas prokýratýranyń baspasóz qyzmetine silteme jasap habarlaıdy.
«Sońǵy ýaqytta dúnıe júzinde «ıslam bankıngine» qyzyǵýshylyqtyń belsendi artýy baıqalýda. Basty sharty nesıeni paıyzsyz berý bolǵandyqtan, jurttyń qyzyǵýyn da túsinýge bolady. Alaıda, osyndaı qarjylyq saýaty tómen halyqtyń nıetin paıdalanǵan kerekýlik azamat qalanyń Sátbaev kóshesinde keńse jaldap, paıyzsyz nesıe berý boıynsha úgit jumysyn uıymdastyrǵan. Ondaǵy nesıe alýdyń basty sharty bastapqy jarna engizý bolypty. Soǵan oraı, aldanǵan azamattar óz qujattarynyń kóshirmelerin jáne 20 000-nan 150 000 teńgege deıin bastapqy jarnalardy alaıaqtyń qolyna sanap bergen. Al ol bolsa bir aı merzim ishinde 900 000-nan 6 500 000 teńgege deıin nesıe alyp berýge ýáde etken», - delingen prokýratýra habarlamasynda. Alaıda, keıinnen nesıeden de, óz qarajatynan da qaǵylǵandar polıtsııaǵa júginipti. Ákki alaıaq jurttan alǵan qarajatynyń biraz bóligin ózine jaratqan eken. «Sot otyrysynyń barysynda sottalýshy jábirlenýshilerge zalaldy ishinara ótedi. Qalalyq №2 sotynyń úkimimen sottalýshyǵa 3 jylǵa bas bostandyǵynan aıyrý belgilenip, úkim zańdy kúshine endi», - delingen baspasóz aıǵaǵynda.
