Islam áleminde demokratııa bolmaıdy deý qate pikir - Erlan Ydyrysov

ASTANA. QazAqparat - Islam men demokratııa qabiletsizdigi arasynda teńdik belgisin qoıatyndardiki durys emes. Búgin elordada ótip jatqan Innovatsııa, tehnologııa jáne bilim máseleleri jónindegi Astana parlamentaralyq forýmynda QR Syrtqy ister mınıstri Erlan Ydyrysov osyndaı pikir bildirdi.

«Musylman ýmmasy óziniń ǵylymı-tehnıkalyq, ınnovatsııalyq jáne aqparattyq damýynda batys áleminen aıtarlyqtaı artta qalǵany qupııa emes. Al dál osy jaıt memleket pen halyqtyń turaqtylyǵynyń, ósimi men ál-aýqatynyń kepili sanalady», - dep atap ótti mınıstr.

Osy rette E.Ydyrysov bir zamanda musylman álemi adamzat balasyna Ál-Farabı, Ábý álı Inn Sına, Ál-Horezmı syndy uly ǵalymdar men aǵartýshylardyń tutas shoǵyryn syıǵa tartqanyn eske salyp ótti.

«Biz Islam men demokratııa qabiletsizdigi, ekonomıkalyq tabys pen zııatkerlik damý arasynda teńdik belgisin qoıatyndardiki durys emes dep esepteımiz. Biz munymen túbegeıli kelispeımiz. Sondyqtan Qazaqstan jańǵyrtý men reforma úderisine belsendi úles qosýǵa umtylady», - dedi E.Ydyrysov.

Sonymen qatar ol búgingi kúni ıslam álemi zamanaýı syn-qaterlerdiń oshaǵynda qalyp otyrǵandyǵyn basa aıtty. «Onyń sebebi az emes jáne onyń basym bóligi sol ýmmanyń óz ishinde jatyr. Bul negizinen tıimsiz memlekettik basqarýǵa, saıası júıeniń jetildirilmeýine, adamı damý ındeksteri kórsetkishteriniń tómendigine, ınvestıtsııa jetispeýshiligine, halyqty áleýmettik qorǵaý salasynyń damymaǵandyǵyna, bilim men medıtsınaǵa qoljetimdiliktiń tómendigine jáne basqa da jaıttarǵa baılanysty», - dedi mınıstr.