Islam Ábishevke qandaı aıyp taǵylyp otyr

ASTANA. QazAqparat - Aýyl sharýashylyǵy mınıstrligine qarasty Sý resýrstary komıteti tóraǵasynyń qamaýǵa alyný sebebi belgili boldy. Bul týraly búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova aıtty, dep habarlaıdy QazAqparat tilshisi.

«Birqatar buqaralyq aqparat quraldarynda Aýyl sharýashylyǵy mınıstrliginiń Sý resýrstary komıtetiniń tóraǵasy paraqorlyqta áshkerelengendigi týraly aqparat taralǵan bolatyn. Búgin biz sotqa deıingi tergeý materıaldary boıynsha resmı aqparatty Sizderdiń nazarlaryńyzǵa usynatyn bolamyz. Jalpy sizderge sý resýrstary salasyndaǵy krımınogendik jaǵdaı boıynsha qysqasha sholýdy jetkizgim keledi. Biz barlyǵymyz, sýmen jabdyqtaý - adamdardyń tirshiligin qamtamasyz etýdiń mańyzdy bóligi bolyp tabylatyndyǵyn túsinemiz», - deıdi Janna Bastarova.

Onyń aıtýynsha, 2017 jáne 2018 jyldary sýmen jabdyqtaý salasyn damytýǵa shamamen 90 mlrd teńge bólingen (2017 jyly - 40,5 mlrd teńge, 2018 jyly - 38,9 mlrd teńge). Sý resýrstary komıteti fýnktsııasynyń biri - respýblıka menshigindegi sý sharýashylyǵy nysandaryn (sý qoımalary, gıdrotehnıkalyq qurylystar, toptalǵan sýqubyrlary) paıdalaný jáne kútip ustaý. QR Aýyl sharýashylyǵy mınıstrliginiń Sý resýrstary komıteti «Qazsýshar» sharýashylyq júrgizý quqyǵyndaǵy respýblıkalyq memlekettik kásipornynyń qyzmetin úılestiredi. Atalǵan respýblıkalyq memlekettik mekeme respýblıkalyq mańyzy bar sý sharýashylyǵy obektilerin (gıdrotehnıkalyq qurylystar men keshendi maqsattaǵy sý qoımalaryn, magıstraldyq sý qubyrlary men ózge sý sharýashylyǵy obektilerin) paıdalanýdy, kútip ustaýdy, qaýipsizdigin qamtamasyz etýdi, sýarý jáne aýyz sýdy berýdi iske asyrady.

«2014 - 2018 jyldary Ulttyq bıýro jáne onyń aýmaqtyq departamentterindegi tergeý nátıjeleri boıynsha Sý resýrstary komıteti jáne «Qazsýshar» respýblıkalyq memlekettik kásipornynyń laýazymdy tulǵalaryna qatysty 38 qylmystyq is sotqa joldandy. Aıaqtalǵan qylmystyq ister boıynsha jalpy zalal somasy 1 mlrd teńgeni qurady. Qazirgi tańda Ulttyq bıýro komıtettegi qylmystyq shemalardy anyqtaýǵa baǵyttalǵan keshendi sharalardy ótkizdi. Osylaısha, QR Aýyl sharýashylyǵy mınıstrligi Sý resýrstary komıtetiniń tóraǵasy jáne onyń sybaılasy, «Qazaq kúresi» dúnıejúzilik federatsııasy» halyqaralyq qoǵamdyq birlestiginiń vıtse-prezıdentine qatysty sotqa deıingi tergeý júrip jatyr», - deıdi ol.

Janna Bastarova komıtet tóraǵasy atalǵan federatsııanyń prezıdenti ekenin eske saldy.

«Olar 5,8 mlrd teńge somasyndaǵy «Sokolov toptyq sý qubyryn rekonstrýktsııalaý jáne qosylǵan aýyldyq eldi mekenderdiń taratýshy jelilerin salý. 2-shi kezek» qyzmetin alý boıynsha memlekettik satyp alý shartyn jasasý úshin merdiger uıymnyń ókilinen qorqytyp alý jolymen 60 mln teńgeden astam asa iri kólemdegi para aldy dep kúdikke ilindi. Osy jyldyń 16 naýryzynda kúdiktilerge qatysty «kúzetpen ustaý» túrindegi bultartpaý sharasy qabyldandy. Tergeý jumystary jalǵasýda», - deıdi ol.

Agenttik ókili sý resýrstary komıteti jáne «Qazsýshar» respýblıkalyq memlekettik kásipornyndaǵy sybaılas jemqorlyq faktileri týraly qandaı da bir aqparaty bar azamattar Agenttikke resmı hatpen, nemese Ulttyq bıýro men onyń aýmaqtyq departamentteriniń kezekshi bólimine habarlasýǵa bolatyndyǵyn jáne aqparatty Tóraǵanyń [e-mail] poshtasyna joldaı alatynyn atap ótti.

Eske sala ketsek, osy jaqynda QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev qamaýǵa alynǵan bolatyn.

«16 naýryzda Astana qalasynyń mamandandyrylǵan aýdanaralyq tergeý soty tergeý amaldaryn júrgizýshi organnyń ótinishin qarastyrdy. 2019 jyldyń 14 mamyryn qosa alǵanda, kúdikti Ábishev Islam Almahanulyna qatysty qamaýda ustaý túrindegi bultartpaý sharasyn sanktsııalaý týraly qaýly shyǵardy», - dep habarlady qalalyq sottyń baspasóz qyzmeti.