Islam Ábish Atbasar bógetin sý buzyp ketý sebebin atady

ASTANA. QazAqparat - Atbasar qalasyndaǵy sý tasqynyna qarsy turǵyzylǵan bógettiń buzylýyna sý jınaý alańyn durys eseptemeý sebep bolýy múmkin. Bul jaıynda búgin Úkimettiń selektorlyq rejimdegi otyrysynan keıin QR AShM Sý resýrstary komıtetiniń tóraǵasy Islam Ábish bildirdi, dep habarlaıdy QazAqparat.

«Bógetti sapasyz saldy dep aıtýǵa bolmaıdy. Múmkin bul bógettiń sý jınalatyn aýmaǵy durys eseptelinbegen bolar. Máselen, sý jınalatyn alań 1 myń gektar bolsa, onda oǵan 10 mln tekshe metr sý jınalady. Al bul 10 mln tekshe metr 10 kúnniń ishinde nemese bir kúnniń ishinde ǵana jınalýy múmkin. Menińshe, bógetti salý barysynda sýdyń 2-3 kúnniń ishinde sý jınaý alańyna tolyqtaı jaıylyp ketý múmkindigi eskerilmegen sııaqty. Mine olardyń jibergen qatelikteri osy bolýy múmkin», - dedi Islam Ábish.

Sonymen qatar ol bulaı bolǵanda da bógetter jyl saıyn sý tasqynyna deıin jáne odan keıin tekserilip otyrýy tıistigin basa aıtty.

Aıta keteıik, Atbasardyń tasqyn sýǵa qarsy salynǵan jańa bógetine 200 mln teńge jumsalǵan. Alaıda, taıaýda qana sý ony buzyp ketip, sonyń saldarynan qaladaǵy 269  úı sý astynda qalsa, taǵy 130-dan astam úıdi sý basý qaýpi bar.