Іskerlik belsendilikti yntalandyrý qajet - Máýlen Áshimbaev

ASTANA. QazAqparat - Búgin VIII saılanǵan Parlamenttiń birinshi sessııasy ashyldy. Jıyn barysynda Memleket basshysy Qasym-Jomart Kemeluly Toqaev Parlament saılaýynda básekelestik pen azamattyq belsendiliktiń joǵary bolǵanyn atap ótti. Bul týraly Parlament Senatynyń tóraǵasy Máýlen Áshimbaev pikir bildirdi, dep habarlaıdy QazAqparat.

Senat spıkeriniń málimetinshe, Májiliske qazaqstandyq qoǵamnyń búgingi ıdeologııalyq kózqarasyn bildiretin alty partııa ótip otyr. Al, depýtattardyń bir mandatty okrýgter boıynsha jáne ózin-ózi usyný arqyly saılanýy Parlamentte ártúrli áleýmettik toptyń múddesin qorǵaýǵa múmkindik beredi.

«Memleket basshysy óz sózinde elimizdiń jańa kezeńdegi damý basymdyqtaryn belgilep, Parlamenttiń aldyna naqty mindetter qoıdy. Soǵan sáıkes joǵary ókildi organ elimizdiń qarqyndy damýy úshin sapaly zańnamalyq baza qalyptastyrýy kerek.

Alda turǵan mindetterdiń biri – kásipkerlikti ekonomıkanyń qozǵaýshy kúshine aınaldyrý. Sondyqtan iskerlik belsendilikti yntalandyrý qajet. Ol úshin shaǵyn jáne orta bıznesti qoldaý men damytýdyń tıimdi sharalar keshenin qolǵa alǵan jón. Osyǵan oraı Memleket basshysy Úkimet pen depýtattyq korpýsqa tıisti mindetter júktedi.

Sonymen qatar Prezıdentimiz jeke menshikti qorǵaý naryqtyq ekonomıkanyń negizi ekenin eskerip, sot jáne quqyq qorǵaý júıesin reformalaýdy jalǵastyrý qajet ekenin aıtty. Sondaı-aq elimizdiń óndiristik áleýetin barynsha arttyrýǵa jáne ınfraqurylymdy damytýǵa qatysty ustanymdardy qaıta qaraý asa mańyzdy. Azyq-túlik qaýipsizdigin qamtamasyz etý, adam kapıtalynyń sapasyn arttyrý, áleýmettik turǵydan osal toptaǵy azamattardy qoldaý máseleleri de basty nazarda», - dedi Máýlen Áshimbaev.

Ol odan bólek, adam quqyqtaryn qorǵaý júıesin nyǵaıtý isi jalǵasa beretinine mán berdi. Memlekettik basqarýdyń tıimdiligin jáne strategııalyq josparlaýdyń sapasyn kóterý mindeti de júktelgenin jetkizdi.

«Memleket basshysy elimizdi damytý baǵdaryn iske asyrý úshin sapaly parlamenttik baqylaýdyń mańyzdy ekenine nazar aýdardy. Sondyqtan depýtattar azamattarmen keri baılanys ornatyp, olardyń múddesin dáıekti túrde qorǵaý arqyly bılik pen qoǵamnyń arasyndaǵy altyn kópir bolýǵa tıis.

Munyń bári VIII saılanǵan Parlamenttiń aldynda aýqymdy jáne mańyzdy mindetter turǵanyn kórsetedi. Olardy iske asyrý jolynda Senat depýtattary azamattyq qoǵammen turaqty dıalog quryp, ortaq múddege sarapshylar men belsendi azamattardy jumyldyra otyryp jumys isteıdi», - delingen Senat tóraǵasynyń jazbasynda.