Іskerlik belsendilik ındeksi mamyrda 0,6 ulǵaıdy – Ulttyq bank
NUR-SULTAN. QazAqparat - QR Ulttyq banki Aqsha-kredıt saıasaty departamentiniń dırektory Jandos Shaımardanov 2021 jylǵy mamyrdaǵy iskerlik belsendilik ındeksine túsinik berdi, dep habarlaıdy QazAqparat.
«Alynǵan baǵalaý nátıjesi boıynsha iskerlik belsendilik ındeksi mamyrda 0,6 ulǵaıyp, 51,1 (sáýirde – 50,5) qurady.
Bul ulǵaıýǵa qyzmet kórsetý sektoryndaǵy kórsetkishtiń 52,3-ke deıin (sáýirde – 50,7) artýy áser etti. Sonymen qatar ónerkásip pen qurylystaǵy kórsetkishter 49,6-ǵa jáne 47,5-ke deıin tómendedi (sáýirde – 50,4 jáne 48,0).
Óńirler boıynsha mamyrda 9 óńirde iskerlik belsendiliktiń jaqsarýy,
8 oblysta – nasharlaýy baıqaldy. Іskerlik belsendiliktiń neǵurlym joǵary deńgeıi Aqmola (57,6) jáne Qaraǵandy (56,6) oblystarynda, tómen deńgeıi Shyǵys Qazaqstan oblysynda (43,9) baıqaldy», - dedi ol.
Onyń aıtýynsha, 2021 jylǵy mamyrda respondentter elde bıznes júrgizý jaǵdaılarynyń jaqsarǵanyn atap ótken.
«Qazirgi bıznes-jaǵdaılaryn baǵalaý jónindegi jaýaptar teńgerimi 4,3 (sáýirde – 3,7) boldy. Kásiporyndar ónimge/qyzmetke suranysty, kommýnıkatsııalarǵa jáne qarjyǵa/kredıtterge qoljetimdilikti oń baǵalady, salyq júktemesi men bıznesti qorǵaý máseleleri teris baǵa aldy.
Kásiporyndardyń kelesi 6 aıdaǵy bolashaq bıznes-jaǵdaılaryna qatysty optımızmi tómendedi: olardy baǵalaý 17,2 (sáýirde – 20,1) boldy. Nátıjesinde ekonomıka boıynsha bıznes ahýaly ındeksi azdap nasharlap, 10,7 (sáýirde – 11,8) boldy.
2021 jylǵy mamyrda saýalnamaǵa 459 kásiporyn qatysty: qurylysta – 67, ónerkásipte – 173, qyzmetterde – 219», - dedi J.Shaımardanov.
