Іskerlik belsendilik ındeksi 48,0-ge deıin kóterildi – Ulttyq bank

ASTANA. QazAqparat - Qyrkúıekte ekonomıkadaǵy iskerlik belsendilikti qalpyna keltirýdiń álsiz belgileri baıqaldy, biraq, burynǵysynsha, besinshi aı qatarynan ındeks teris aımaqta qalyp otyr.

Bul týraly QR Ulttyq bankiniń aqsha-kredıt saıasaty departamentiniń dırektory Rústem Orazalınniń materıalynda aıtylǵan.

Ondaǵy málimetterge qaraǵanda, iskerlik belsendilik ındeksi daıyn ónimge suranys pen taýarly-materıaldyq qorlardyń ulǵaıýy esebinen 48,0-ge (tamyzda – 47,6) deıin kóterildi.

Taý-ken óndirý ónerkásibinde jáne qurylysta kórsetkishtiń birshama jaqsarǵany baıqalady: ındeks tıisinshe 47,5 jáne 46,3 belgisine deıin (tamyzda 45,1 jáne 45,6-dan) kóterildi. Qyzmet kórsetý sektorynda ındeks 48,2-ge deıin (tamyzda 48,6-dan) azdap tómendegen. Óndiristik sektorda kórsetkish is júzinde ózgerissiz qalyp, 48,6 boldy (tamyzda – 48,7).

2022 jylǵy qyrkúıekte kásiporyndardyń qazirgi bıznes jaǵdaılaryn baǵalaýy (-) 6,2 (tamyzda – (-)3,2) bolyp, teris kúıinde qaldy.

Kásiporyndardyń aldaǵy 6 aıdaǵy bolashaq bıznes jaǵdaılaryn baǵalaýy azdap tómendegenine qaramastan, oń kórsetkish kórsetti.

Sońynda búgingi jáne keleshektegi bıznes jaǵdaılardy ortasha baǵalaýdy bildiretin bıznes ahýaly ındeksi tómendep, 4,4 (tamyzda – 6,6) boldy.

2022 jylǵy qyrkúıekte daıyn ónimge suranys edáýir jaqsardy. Oń jáne teris jaýaptar arasyndaǵy teńgerim 5,8 boldy. Teris jaýaptardyń basym bolýyna qaramastan, qarjy/kredıtke qoljetimdiliktiń jaqsy baǵalanǵany baıqaldy. Jaýaptar teńgerimi
(-)0,9 boldy. Bıznes jaǵdaılarynyń qalǵan faktorlaryn (bıznesti qorǵaý, salyq júktemesi jáne kommýnıkatsııalarǵa qol jetkizý máseleleri) baǵalaý tıisinshe (-)5,6, (-)5,4 jáne (-)3,0 bolyp, barynsha teris deńgeıde qaldy.