Iskar Kýrbaev Wrestling Stars týrnıriniń jeńimpazy atandy

ASTANA. KAZINFORM – Astanada ótip jatqan Wrestling Stars týrnıriniń grek-rım kúresinen 55 keli salmaqta jeńimpaz anyqtaldy. 

Altyn júldeni sarapqa salý úshin bozkilemge tórt jylǵa jýyq úzilisten keıin oralǵan álem chempıonatynyń kúmis júldegeri Jahansha Qorlan jáne 20 jasqa deıingi jastar arasyndaǵy álem chempıony Iskar Kýrbaev shyqty. Tartysty ótken beldesýde, Qorlan tamasha ádis jasap kózge tústi. Alaıda, ekinshi kezeńde Iskar shabýyldy arttyryp, qortyndysynda 9:5 esebimen jeńiske jetti.

Aıta keteıik, álemdik kúres juldyzdary bas qosatyn dástúrli Wrestling Stars týrnıri Astanadaǵy Beeline Arena sport kesheninde ótip jatyr.

Dodaǵa eki dúrkin álem chempıony, tórt dúrkin Eýropa chempıony, Rıo Olımpıadasynyń qola júldegeri Frank Chamıso jáne Parıj Olımpıadasynyń qola júldegeri, albanııalyq Cherman Valıev, ázerbaıjandyq Aganazar Novrýzov, ózbekstandyq Mırzo Haıtov, qyrǵyzstandyq Almaz Smanbekov syndy sheteldik tanymal balýandar keldi.

Sondaı-aq erkin kúresten úsh dúrkin Azııa chempıony, álem chempıonattarynyń qola júldegeri Azamat Dáýletbekov, eki dúrkin Azııa chempıony, álem chempıonatynyń qola, Azııa oıyndarynyń kúmis júldegeri Danııar Qaısanov jáne erkin kúresten Azııa chempıony Sanjar Dosjanov, Azııa chempıonatynyń qola júldegeri Meırambek Qartbaı álemdik týrnırde baq synaıdy.