Iskander Aısarıev Qazaqstannyń Albanııa Respýblıkasyndaǵy Tótenshe jáne ókiletti elshisi boldy
ASTANA. KAZINFORM – Iskander Aısarıev Qazaqstannyń Albanııa Respýblıkasyndaǵy Tótenshe jáne ókiletti elshisi bolyp taǵaıyndaldy. Bul týraly Aqordanyń baspasóz qyzmeti habarlady.
«Memleket basshysynyń Jarlyǵymen Iskander Júsipuly Aısarıev Qazaqstan Respýblıkasynyń Albanııa Respýblıkasyndaǵy Tótenshe jáne Ókiletti Elshisi laýazymyna taǵaıyndaldy», - delingen qujatta.
Memleket basshysynyń Jarlyǵymen Qazaqstan Respýblıkasynyń Túrkııa Respýblıkasyndaǵy Tótenshe jáne Ókiletti Elshisi Erkebulan Ońalbekuly Sápıev Qazaqstan Respýblıkasynyń Albanııa Respýblıkasyndaǵy Tótenshe jáne Ókiletti Elshisi qyzmetin qosa atqarýshy laýazymynan bosatyldy.
Iskander Júsipuly Aısarıev 1976 jylǵy 28 naýryzda Almaty qalasynda týǵan. 1998 jyly Abaı atyndaǵy Almaty memlekettik ýnıversıtetin, 2002 jyly Almaty úzdiksiz bilim berý ýnıversıtetin bitirdi.
Óziniń dıplomatııalyq qyzmetin 1999 jyly QR Syrtqy ister mınıstrliginiń Ortalyq apparaty men sheteldegi mekemelerdiń qyzmetin qamtamasyz etý departamentiniń jetekshi mamany retinde bastaǵan.
2001 jyly QR SІM Kadrlar jáne baqylaý departamentiniń attashesi laýazymynda bolyp, keıin QR SІM Memlekettik protokol qyzmetine aýysty.
2002-2004 jyldar aralyǵynda QR Syrtqy ister mınıstrliginiń TMD isteri jónindegi komıteti Ortalyq Azııa jáne Zakavkaze bóliminiń attashesi, úshinshi jáne ekinshi hatshysy laýazymdarynda qyzmet etti.
2004-2005 jyldary QR SІM Azııa jáne Afrıka departamentiniń ekinshi hatshysy bolyp jumys istedi, al 2005-2009 jyldar aralyǵynda Túrikmenstandaǵy QR Elshiliginde úshinshi jáne ekinshi hatshysy qyzmetin atqardy.
2009-2011 jyldar aralyǵynda QR SІM Memlekettik protokol qyzmetiniń keńesshisi, keıin basqarma basshysy bolǵan, 2011-2013 jyldary – Ýkraınadaǵy QR Elshiliginiń keńesshisi.
2013-2015 jyldar aralyǵynda QR SІM Memlekettik protokol qyzmetiniń basqarma basshysy qyzmetin atqardy.
2015 jyly QR SІM Memlekettik protokol qyzmeti basshysynyń orynbasary, odan keıin 2019 jyly Memlekettik protokol qyzmetiniń basshysy bolyp taǵaıyndaldy.
Qazaqstannyń Albanııadaǵy Elshisi bolyp taǵaıyndalǵanǵa deıin 2023 jyldyń sáýir aıynan bastap QR SІM Erekshe tapsyrmalar jónindegi elshisi qyzmetin atqardy.
ІІ synypty Tótenshe jáne Ókiletti Ýákil dıplomatııalyq dárejege ıe.
Aǵylshyn tilin meńgergen.
