Isımbaeva: Joldaý - Qazaqstannyń jańa damý dáýirin aıqyndaıtyn baǵdarlama
ASTANA. QazAqparat - Qazaqstannyń Úshinshi jańǵyrýy jahandyq básekege qabilettilik turǵysynda aldaǵy jańǵyrtýlardyń qısyndy jalǵasy. Búgin Ortalyq kommýnıkatsııalar qyzmetindegi brıfıngte QR Parlamenti Májilisi tóraǵasynyń orynbasary, «Nur Otan» partııasy fraktsııasynyń jetekshisi Gúlmıra Isımbaeva osylaı málim etti, dep habarlaıdy QazAqparat.
«Memleket basshysynyń jyl saıynǵy Joldaýy men halyqqa úndeý tastaýy Qazaqstannyń buljymas saıası dástúrine aınaldy. Qazaqstan qoǵamy Joldaýdy taǵatsyzdana kútedi. Qazirgi Joldaýynda da basyp ótilgen bir kezeńniń qorytyndysy shyǵarylyp, aldaǵy turǵan maqsat-mindetter aıqyndalýda. Osy ýaqytqa deıin Elbasy aıtqandaı, eki jańǵyrý kezeńi ótti. Burynǵy joldaýlarda qabyldanǵan mindettemelerdiń arqasynda qazirgi tańda júzdegen aýrýhanalar men emhanalar, myńdaǵan mektepter men balabaqshalar, ondaǵan myń shaqyrymdyq jańa joldar, júzdegen myń sharshy metr turǵyn úıler, jańa kásiporyndar men jumys oryndary túrinde naqty kórinis taýyp otyr»,-dep toqtaldy G. Isımbaeva.
Osy oraıda depýtat Qazaqstannyń Úshinshi jańǵyrýy jahandyq básekege qabilettilik turǵysynda aldaǵy jańǵyrtýlardyń qısyndy jalǵasy ári perspektıvalyq damýy dep qabyldanatynyn atap ótti.
Úshinshi jańǵyrý - bul memleketimizdiń ósýi men álemniń eń damyǵan 30 memlekettiń qataryna qarqyndy ený úshin bolashaqqa bastaıtyn senimdi kópir.
«Al Elbasy Joldaýynda sol úshin qandaı is-sharalar atqarylýy qajet ekendigin kórsetilip otyr. Osy rette jańa ekonomıka salasyn qurý men dáripteý, ásirese, ІT-tehnologııalarǵa negizdelgen kásiporyndardy qalyptastyrý eskerilýde. Sonymen qatar bazalyq ekonomıkalyq salalaryn jańǵyrtýǵa erekshe mán berildi. Qazaqstan úshin aýyl sharýashylyǵy bazalyq ekonomıka salasy bolyp tabylady. Búginde Elbasynyń qoıyp otyrǵan mindeti men maqsaty jańa taza ári tabıǵı ónimder men taǵamdardy shyǵarý, sonymen Qazaqstan halqyn qamtamasyz etý jáne eksportqa shyǵarý dárejesine jetý bolady. Munymen qosa, jappaı kásipkerlikti damytý, sol aryly halyqty jemisti jumyspen qamtamasyz etýge qol jetkizý eskerilgen»,-dep naqtylady Májilisi tóraǵasynyń orynbasary.
Onyń sózine qaraǵanda, bul Joldaýda arnaıy basymdylyq bolyp kórsetilip otyrǵan mańyzdy másele - ol jalpy búkil Qazaqstannyń, onyń ishinde ár azamattyń qaýipsizdigin qamtamasyz etý.
«Tek qaýipsiz memleket qana alǵa qoıylǵan reformalardy júzege asyra alady. «Qazaqstannyń úshinshi jańǵyrýy: jahandyq básekege qabilettilik» atty Joldaý Qazaqstannyń jańa damý dáýirin aıqyndap beretin negizgi baǵdarlamalyq qujat. Onda belgilengen bes basymdyqtyń árbiriniń mindeti ekonomıkanyń ósimi men jappaı kásipkerikti damytýdy kózdeıdi. Mundaı maqsat halyqtyń ál-aýqatyn jaqsartý men ómir súrý deńgeıin tómendetýge jol bermeýdi qamtyp otyr»,-dedi Isımbaeva.
