Іshkilikke salynǵan ulyn óltirgen keıýana qylmystyq jazadan bosatyldy
TÚRKІSTAN. QazAqparat - Túrkistan oblysynda ishkilikke salynǵan ulyn pyshaqtap óltirgen 85 jastaǵy qarııa qylmystyq jazadan bosatyldy. Oblystyq qylmystyq ister jónindegi mamandandyrylǵan aýdanaralyq soty barlyq mán-jaıdy eskere kele, egde jastaǵy zeınetker turǵylyqty jerinde emdelýi qajet degen qaýly shyǵarǵan. Bul týraly atalǵan sottyń baspasóz qyzmeti málimet taratty, dep habarlaıdy QazAqparat tilshisi.
Jeti aıǵa sozylǵan sot talqylaýy barysynda aıyptalýshy ájeıdiń otbasynda bolǵan qylmystyq is jan-jaqty qaraldy. Qarııanyń sózinshe, 57 jastaǵy uly ishkilikke salynyp, tynysh ómir súrýge múmkindik bermegen. Joldasy tiri kezde ákesine birneshe ret qol jumsaǵan bolyp shyqty. Ol ómirden ótken soń anasyn soqqyǵa jyǵatyn bolǵan. Osynyń bári jınalyp, ábden ashýǵa býlyqqan ana 15 naýryz kúni balasyna ashana pyshaǵyn suǵyp alǵan. Uly kókirek tusyna tıgen pyshaq jaraqatynan jantásilim etken. Sot otyrysy kezinde aıyptalýshynyń týystarynan da jaýap alynǵan. Kýágerler zeınetkerdiń sózin rastap, ulynyń alkogoldi sýsyndarǵa qumar bolǵanyn aıtqan. Óz kezeginde sot-medıtsınalyq saraptama qorytyndysy qart ananyń psıhıkalyq aýytqýy bar ekenin anyqtaǵan.
Esterińizge sala keteıik, qylmystyq oqıǵa osy jyldyń naýryz aıynda Saıram aýdanynda oryn alǵan edi. Tergeý barysynda 85 jastaǵy zeınetkerdiń óz ulyn pyshaqtap óltirgeni anyqtalǵan bolatyn. Jaýap alý barysynda qart ana mundaı qadamǵa ishkilikke salynǵan ulynan sharshaǵan soń barǵanyn aıtqan bolatyn.
