Іshki týrızmdi tańdaıtyn qazaqstandyqtardyń sany artty
ASTANA. QazAqparat - Qazaqstanda ishki týrızmdi tańdaýshylar sany jyl sanap artýda. Bul týraly «Kazakh Tourism» UK» AQ Basqarma tóraǵasy Rashıd Kúzembaev Astanada ótken baspasóz máslıhatynda málim etti, dep habarlaıdy QazAqparat tilshisi.
Rashıd Kúzembaevtyń aıtýynsha, Qazaqstanda ishki týrızmdi damytýǵa barlyq múmkindik bar. Tek soǵan jaǵdaı jasaý kerek.
«Elimizdiń tabıǵaty erekshe - munda taý da, jazyq dala da, orman da, kól de, ózen de bar. Qýantarlyǵy, sońǵy jyldary otandyq saıahatshylardyń sany artýda. QR Ulttyq ekonomıka mınıstrligi, Statıstıka komıtetiniń málimeti boıynsha 2017 jyly ishki týrızmdi tańdaýshylar, 2016 jylymen salystyrǵanda 20% ósken. Salystyrmaly túrde 2012-2016 jyldar aralyǵyn alsaq 4 jyl ishinde 6% ǵana ósken bolatyn. Bul, qazaqstandyq saıahatshylardyń sońǵy jyldary otandyq týrızmdi tańdaýynyń nátıjesi. Al sheteldik týrısterdiń Qazaqstanǵa kelýi 2017 jyly aldyńǵy jylmen salystyrǵanda 18% artqan. Jáne bul kórsetkish jyl sanap ósýde», - dedi «Kazakh Tourism» kompanııasynyń basshysy.
Sonymen qatar ústimizdegi jyldyń birinshi jartyjyldyq esebi boıynsha otandyq týrızmdi tańdaýshy saıahatshylar - 6,8%, Qazaqstanǵa kelgen sheteldikterdiń sany 29,4% artqan.
Qazaq týrızm basshysynyń málimetinshe, bul Qazaqstan táýelsizdik alǵaly bergi joǵary kórsetkish.
