Іshki memlekettik aýdıt: 288 mlrd teńgeniń zań buzýshylyǵy anyqtaldy - komıtet

ASTANA. QazAqparat – Qarjy mınıstrligi ishki memlekettik aýdıt komıtetiniń tóraǵasy Erjan Myńjasarov otandyq aýdıt salasyndaǵy sońǵy statıstıkany jarııalady, dep habarlaıdy QazAqparat tilshisi.

Komıtet basshysynyń aıtýynsha, bıyl 9 aıdyń ishinde ishki memlekettik aýdıt boıynsha 1 851 tekserý júrgizildi.

«Tekserý nátıjesinde 288 mlrd teńgege jýyq qarjy kóleminde zań buzýshylyq anyqtaldy. Onyń ishinde 10 mlrd teńgege jýyǵy óteldi. Sondaı-aq, 29 mlrd teńgege jýyq kólemde taýarlar jetkizilip, qyzmet kórsetildi. Sonymen qatar, 233 mlrd-tan astam teńgeniń býhgalterlik esep boıynsha kemshilikteri qalpyna keltirildi. Odan bólek, aýdıt obektilerine 1 638 usynys berilip, onyń 70%-dan astamy oryndaldy», - dedi Erjan Myńjasarov Ortalyq kommýnıkatsııalar qyzmeti alańynda ótken baspasóz máslıhatynda.

Spıkerdiń málimetinshe, Ákimshilik quqyq buzýshylyq kodeksine sáıkes 6 901 materıal boıynsha is qozǵalyp, 605 mln teńgeden astam aıyppul salyndy.

«Búginde salynǵan aıyppuldyń 587 mln teńgesi, ıaǵnı 97%-y bıýdjetke óteldi. Sonymen qatar, 1 595 adam jaýapkershilikke tartyldy. 150-ge jýyq materıal quqyq qorǵaý organdaryna jiberildi. Onyń ishinde qazirgi ýaqytta 80 materıal boıynsha qylmystyq is qozǵaldy», - dedi E. Myńjasarov.

Erjan Myńjasarov memlekettik aýdıt degenimiz – memleket aktıvterin tıimdi basqarý, bıýdjet qarajatyn jumsaýdy taldaý, baǵalaý jáne tekserý ekenin eske saldy. Ondaǵy maqsat – bıýdjet qarajaty men memleket resýrstaryn tıimdi paıdalanýdy arttyrý. Іshki aýdıtti arnaıy sertıfıkaty bar memlekettik aýdıtorlar júrgizedi.