Іshki kóshi-qon kórsetkishi jylyna 300 myń adam deńgeıinde turaqtalyp otyr - T. Dúısenova
ASTANA. Qazannyń 29-y. QazAqparat /Qanat Mámetqazyuly/ - Іshki kóshi-qon kórsetkishi jylyna 300 myń adam deńgeıinde turaqtalyp otyr. Bul týraly QR Parlamenti Májilisinde kóshi-qon salasyndaǵy zańnamalardyń halyqaralyq tájirıbesine arnalǵan semınar barysynda Eńbek jáne halyqty áleýmettik qorǵaý mınıstrliginiń Jaýapty hatshysy Tamara Dúısenova málim etti,
dep habarlaıdy QazAqparat.
«Ýrbanızatsııa jaǵdaıynda, onyń ústine ekonomıkadaǵy sońǵy qurylymdyq ózgerister barysynda halyqtyń ishki kóshi-qony aıtarlyqtaı aýqymdanyp otyr. Máselen, elimizde oblysaralyq jáne oblysishilik kóshi-qon barysynda 1991 jyldan 2008 jylǵa deıingi aralyqta 5 mln.-ǵa tarta adam úderisterge qatysty. Qazirgi tańda ishki kóshi-qon kórsetkishi jylyna 300 myń adam deńgeıinde turaqtalyp otyr. Bul rette ishki kóshi-qonnyń basym bóligin aýyldyq jerler quraıdy», dedi Jaýapty hatshy.
Onyń aıtýynsha, sońǵy eki jyldaǵy kórsetkishter boıynsha kóshi-qonnyń teris saldosy Qaraǵandy, Mańǵystaý, Ońtústik Qazaqstan oblystarynan basqa respýblıkanyń barlyq óńirlerinde oryn alǵany baıqalǵan. «Kóshi-qonnyń osylaı beleń alýy tek oń nátıjeler berip qana qoımaıdy, birqatar qaýipterge de uryndyrýy múmkin. Máselen, álemdik kóshi-qon úderisteri jáne halyqtyń qartaıýy jaǵdaıynda adam resýrstary úshin básekelestiktiń jandana túsýi kóshi-qonnyń oń saldosyn kemite túsedi. Sonymen birge, jergilikti jerlerdegi maman biliktiligi talaptary men jumys kúshin usyný eńbek naryǵyndaǵy alshaqtyqty týdyryp, shetelden biliktiligi tómen jumysshylardy da tartýǵa jaǵdaı týǵyzdy. Bul úderistiń aldaǵy ýaqytta da saqtalyp turýy jalpy memlekettiń básekege qabilettiligine keri áser etýi múmkin. Sondaı-aq, Ortalyq Azııadaǵy zańsyz kóshi-qon máselesi ishki eńbek naryǵynda básekelestikti arttyryp, jergilikti biliktiligi tómen jumysshylardy osy naryqtan ysyryp,sonyń saldarynan áleýmettik qysym týdyrýy múmkin», dedi T. Dúısenova.
