Іshki ister organdarynyń qyzmetkerleri atý qarýyn eskertýsiz qoldaný quqyǵynan aıyrylýy múmkin
ASTANA. 22 qańtar. QazAqparat - Búgin Parlament Májilisiniń spıkeri Nurlan Nyǵmatýlınniń tóraǵalyǵymen ótip jatqan palatanyń jalpy otyrysynda jańa redaktsııadaǵy «Іshki ister organdary týraly» zań jobasy ekinshi oqylymda maquldandy.
Zań jobasy Іshki ister mınıstrliginiń quzyretterin ortalyq apparat jáne jalpy ishki ister organdary retinde bólý, olardyń mindetteri men quqyqtaryn aıqyndaý, zańdylyqty nyǵaıtýdyń quqyqtyq kepildikterin qamtamasyz etý men polıtsııany oǵan tán emes fýnktsııalardan aryltý kózdeledi. Jańa redaktsııadaǵy zań jobasy 9 bólimnen turady. Onyń mazmunyna keler bolsaq, qujattyń basty baǵyttarynyń biri qoǵamdyq baqylaýdy azamattardyń quqy men bostandyǵyn qorǵaýmen aınalysatyn ishki ister organdarynyń qyzmetine berý bolyp tabylady. Osyǵan oraı Іshki ister mınıstrliginiń janynan da, óńirlik ishki ister departamentteriniń janynan da qoǵamdyq keńester qurylatyn bolady. Zań jobasynyń jáne bir parasy ishki ister organdarynyń jumysyndaǵy arnaýly qaǵıdattardy qamtamasyz etedi. Bular - adamnyń jáne azamattyń quqyǵyn saqtaý jáne syılaý, ashyqtyq, jarııalylyq, azamattyq qoǵam ınstıtýttarymen, buqaralyq aqparat quraldarymen jáne ishki ister organdarynyń biregeı júıesinde ózara is-qımylda bolý. Sonymen qatar, qujatta ishki ister organdary qyzmetkerlerine azamattardy kýálik etýge májbúrleýge, kúsh qoldanýǵa jáne quqyqqa qaıshy áreketterge tikeleı tyıym salatyn norma qamtylyp otyr. Budan bólek, qoǵamnyń keńinen talqysyna ushyraǵan polıtseılerdiń atys qarýyn qoldanýǵa qatysty máselesi de qarastyrylyp otyr. «Qoǵamda qyzý pikirtalas týdyrǵan ishki ister organdary qyzmetkeriniń atý qarýyn eskertýsiz qoldaný quqyǵy qamtylǵan norma zań jobasynan alynyp tastaldy», - dedi Májilis depýtaty Nurlan Ábdirov.
