Іshki ister organdarynyń qazaq tili kýrstaryna 20 myńnan astam qyzmetker qatysady - ІІM

Bul týraly búgin QR Іshki ister mınıstrliginde ótken «Іshki ister organdaryndaǵy memlekettik tildiń jaǵdaıy týraly» taqyrybynda ótken semınar-keńeste atalmysh vedomstvo basshysynyń orynbasary Amantaı Kúreńbekov osylaı aıtty, dep habarlaıdy QazAqparat tilshisi.

 «Elimizde birtutas til saıasaty qalyptasyp, qazaq tili memlekettik til mártebesine ıe boldy. Іshki ister organdary óz kezeginde, memlekettik tildi damytý máselesin basym baǵyttarynyń biri dep sanaıdy. Mınıstrlik 2007 jyldan bastap is-qaǵazdaryn memlekettik tilge tolyq kóshirdi. Osy rette vedomstvo basshylyǵy memlekettik tilde qujat aınalymyn qamtamasyz etýdi baqylaýdy kúsheıtti. Nátıjesinde ishki ister organdarynyń ózara hat almasýynda memlekettik tildiń deńgeıi edáýir artyp otyr»,  dep atap ótti A.Kúreńbekov.

Іshki ister mınıstri orynbasarynyń aıtýynsha, qyzmetkerlerdiń memlekettik tildi erkin meńgerýine qarjylyq, tehnıkalyq jáne uıymdastyrýshylyq jaǵdaı jasalyp otyr. «Іshki ister mınıstriniń buıryǵyna sáıkes ishki ister organdarynyń memlekettik tildi jetik meńgergen jáne ony is-júrgizýde qoldana biletin, ulty qazaq emes qyzmetkerlerin materıaldyq jáne moraldyq yntalandyrý jolǵa qoıylǵan. Mundaı tájirıbe Almaty, Qaraǵandy, Batys Qazaqstan, Pavlodar oblystarynyń ishki ister deparatamentterinde 10 paıyz ústemaqy tóleý arqyly júzege asyrylýda»,  dedi ol.

Sonymen qatar, semınar-keńeste ishki ister organdarynyń jyl saıyn uıymdastyrylatyn qazaq tili kýrstary jaıly sóz boldy. Oǵan qatysqan qyzmetkerlerdiń basym bóligi qujattardy memlekettik tilde daıyndaı alatyndyǵy týraly sertıfıkat alǵan. «Eń aldymen, memlekettik tildegi qujattardyń sapasyna, memlekettik tildi jetik meńgergen mamandardy daıyndaý máselesine erekshe mán berý qajet. Memlekettik tildi aýdarma til retinde paıdalaný tájirıbesin yǵystyryp, qujattyń o bastan saýatty, qazaq tilinde júrgizilýin qamtamasyz etýimiz tıispiz»,  dep atap ótti A.Kúreńbekov.