Іshki ister organdarynyń 32 qyzmetkeri memlekettik nagrada aldy
Marapattaý rásimi Іshki ister mınıstrliginde ótti.
Іshki ister mınıstri Erlan Turǵymbaev áskerı jáne qyzmettik boryshyn úlgili oryndaǵany jáne tártipti qamtamasyz etýde kórsetken erik-jigeri úshin ІІM-niń 540 qyzmetkeri men áskerı qyzmetshilerin marapattady.
E.Turǵymbaev saltanatty jıynda Qazaqstannyń Tuńǵysh Prezıdenti-Elbasy Nursultan Nazarbaevtyń basshylyǵymen bizdiń elimiz álemdegi turaqty jáne bedeldi memleketke aınalǵany týraly Memleket basshysy Qasym-Jomart Toqaevtyń aıtqan sózin eske aldy.
Sonymen birge, mınıstr eldegi quqyqtyq tártiptiń deńgeıi polıtsııanyń jumys sapasymen tyǵyz baılanysty ekenin, árqaısymyzdyń kúsh-jigerimiz qylmysqa jáne kez kelgen zań buzýshylyqtarǵa batyl qarsy turýǵa baǵyttalýy tıistigin, halyq pen polıtsııa arasynda berik qarym-qatynas qalyptastyrý, azamattardyń ishki ister organdaryna degen senimin arttyrý mańyzdy mindet bolyp tabylatynyn taǵy bir márte atap ótti.
«Іshki ister organdarynyń jeke quramy aldaǵy ýaqytta da quqyqtyq tártip pen azamattardyń qaýipsizdigin qamtamasyz ete otyryp, ózderiniń qyzmettik mindetterin úlgili jáne qajyrly atqara beredi dep senemin», - atap ótti ol.
Sondaı-aq vedomstvo basshysy Táýelsizdik kúni qarsańynda ardagerlerge erekshe alǵys bildirdi.
Іs-sharanyń saltanatty bóligi aıaqtalǵan soń qyzmetkerler, ishki ister organdary men Ulttyq ulan ardagerleri, sondaı-aq shaqyrylǵan qonaqtar úshin merekelik kontsert boldy.
Qazaqstannyń táýelsizdigi jyldary qyzmettik boryshyn adal oryndaǵany, erligi men batyldyǵy úshin ishki ister organdary men Ulttyq ulannyń 1340 qyzmetshisine memlekettik nagrada berilse, onyń ishinde 131-i qaza tapqannan keıin nagradtaldy.
Sonymen qatar, shara barysynda «Quqyq tártibin qamtamasyz etýge qosqan úlesi úshin» medalimen QR Aqparat jáne qoǵamdyq damý vıtse-mınıstri Nurgúl Maýberlınova, «Qazaqstan» TKRK» AQ tóraǵasy Lázzat Tanysbaı, «Habar» agenttigi» AQ tóraǵasy Erlan Bekhojın jáne ózge de BAQ basshylary marapattaldy.
